بیجنگ: امریکی صدر ڈونلڈ ٹرمپ نے چینی صدر شی جن پنگ سے ملاقات کے بعد چین پر عائد ٹیرف میں 10 فیصد کمی کا اعلان کر دیا ہے۔
غیر ملکی خبر رساں اداروں کے مطابق صدر ٹرمپ نے کہا کہ ٹیرف 57 فیصد سے کم ہو کر 47 فیصد کر دیا گیا ہے، جو فوری طور پر نافذ العمل ہوگا۔
ٹرمپ نے ملاقات کو ’’انتہائی مثبت‘‘ قرار دیتے ہوئے کہا کہ امریکا اور چین کے درمیان متعدد اہم اقتصادی امور پر اتفاق رائے ہو چکا ہے۔ ان کے مطابق، دونوں ممالک نے سویابین کی خریداری دوبارہ شروع کرنے اور نایاب معدنیات کی تجارت میں حائل رکاوٹیں ختم کرنے پر بھی اتفاق کیا ہے۔
امریکی صدر نے مزید اعلان کیا کہ وہ آئندہ سال اپریل میں چین کا دورہ کریں گے، جس کے بعد صدر شی جن پنگ امریکا کا دورہ کریں گے۔
ٹرمپ نے کہا کہ امریکا اور چین یوکرین کے معاملے پر مشترکہ تعاون بڑھائیں گے، تاہم تائیوان کے مسئلے پر کوئی بات چیت نہیں ہوئی۔
انہوں نے یہ بھی عندیہ دیا کہ امریکا کے لیے دیگر عالمی طاقتوں کی طرح ایٹمی ہتھیاروں کے تجربات دوبارہ شروع کرنا مناسب ہوگا، تاہم ٹیسٹنگ سائٹس کے حوالے سے حتمی فیصلہ بعد میں کیا جائے گا۔
