بلوچستان میں سکیورٹی فورسز کی کارروائیاں، 18 دہشت گرد ہلاک
کوئٹہ: بلوچستان کے مختلف علاقوں میں سکیورٹی فورسز کی کارروائیوں کے دوران 18 دہشت گرد ہلاک ہو گئے۔
پاک فوج کے شعبہ تعلقاتِ عامہ (آئی ایس پی آر) کے مطابق 28 اور 29 اکتوبر کو بلوچستان میں دو الگ الگ انٹیلی جنس بیسڈ آپریشنز کیے گئے، جن میں مجموعی طور پر 18 دہشت گرد مارے گئے۔
آئی ایس پی آر کے مطابق کوئٹہ کے علاقے چلتن میں دہشت گردوں کی موجودگی کی اطلاع پر کارروائی کی گئی، جس دوران دہشت گردوں کے ٹھکانے کو مؤثر انداز میں نشانہ بنایا گیا۔ شدید فائرنگ کے تبادلے میں بھارتی سرپرستی یافتہ 14 دہشت گرد مارے گئے۔
ترجمان کے مطابق ایک اور کارروائی کیچ کے علاقے بلیدہ میں کی گئی، جہاں دہشت گردوں کے ایک ٹھکانے کو تباہ کرتے ہوئے 4 دہشت گرد ہلاک ہوئے۔ آپریشن کے دوران بڑی مقدار میں اسلحہ، گولہ بارود اور بارودی مواد برآمد کیا گیا۔
آئی ایس پی آر کا کہنا ہے کہ سکیورٹی فورسز نے علاقے میں کلیئرنس آپریشن شروع کر دیا ہے تاکہ کسی بھی بھارتی حمایت یافتہ دہشت گرد کو انجام تک پہنچایا جا سکے۔
ترجمان کے مطابق فورسز اور قانون نافذ کرنے والے ادارے ’عزمِ استحکام‘ کے تحت ملک سے دہشت گردی کے مکمل خاتمے کے لیے پرعزم ہیں۔
