نیویارک میں اقوام متحدہ کی جنرل اسمبلی اجلاس کے موقع پر وزیراعظم پاکستان شہباز شریف اور ورلڈ بینک کے صدر اجے بنگا کے درمیان اہم ملاقات ہوئی۔ اس ملاقات میں نائب وزیراعظم اسحاق ڈار، وزیر خزانہ محمد اورنگزیب اور وزیر اطلاعات عطا تارڑ بھی شریک ہوئے۔
ملاقات کے دوران وزیراعظم شہباز شریف نے پاکستان کے جامع اصلاحاتی ایجنڈے پر روشنی ڈالی اور عالمی بینک کی کورونا وبا اور 2022 کے تباہ کن سیلاب کے دوران تعاون پر شکریہ ادا کیا۔ وزیراعظم نے اجے بنگا کی قیادت میں ورلڈ بینک کے آپریشنز کو بہتر بنانے اور نجی شعبے میں سرمایہ کاری بڑھانے کے اقدامات کو سراہا۔
وزیراعظم نے ورلڈ بینک کے نئے کنٹری پارٹنرشپ فریم ورک (2026-2035) کی بھی تعریف کی۔ اس موقع پر ورلڈ بینک کے صدر اجے بنگا نے پاکستان کے جاری اصلاحاتی اقدامات کی تعریف کرتے ہوئے تعاون جاری رکھنے کی یقین دہانی کرائی۔
یہ ملاقات پاکستان اور عالمی بینک کے درمیان ترقیاتی شراکت داری کو مزید مضبوط بنانے کے حوالے سے اہم پیش رفت قرار دی جا رہی ہے۔
