بارشوں اور سیلاب کے باعث پنجاب میں قومی و صوبائی اسمبلی کے ضمنی انتخابات ملتوی
پنجاب میں حالیہ بارشوں اور سیلاب کی تباہ کاریوں کے باعث قومی اور صوبائی اسمبلی کے ضمنی انتخابات ملتوی کر دیے گئے ہیں۔ الیکشن کمیشن آف پاکستان کی جانب سے اس حوالے سے باضابطہ آرڈر جاری کر دیا گیا ہے۔
الیکشن کمیشن کے مطابق قومی اسمبلی کے حلقہ این اے 66 وزیرآباد، این اے 96 فیصل آباد، این اے 104 فیصل آباد، این اے 129 لاہور اور این اے 143 ساہیوال میں ضمنی انتخابات ملتوی کیے گئے ہیں۔ اسی طرح صوبائی اسمبلی کے حلقہ پی پی 73 سرگودھا، پی پی 87 میانوالی، پی پی 98 فیصل آباد اور پی پی 203 ساہیوال میں بھی پولنگ مؤخر کر دی گئی ہے۔
کمیشن کے مطابق پنجاب میں سیلاب کی وجہ سے مواصلاتی نظام درہم برہم ہو گیا ہے، جبکہ سرکاری اور نجی انفرااسٹرکچر کو شدید نقصان پہنچا ہے۔ متعدد اسکول عمارتیں جو پولنگ اسٹیشنز اور انتخابی ریکارڈ کے لیے استعمال ہونا تھیں، پانی میں بہہ جانے یا متاثر ہونے کے باعث دستیاب نہیں رہیں۔
اعلامیے میں کہا گیا ہے کہ سول انتظامیہ، قانون نافذ کرنے والے ادارے اور دیگر ادارے ریسکیو اور ریلیف آپریشن میں مصروف ہیں، ایسے میں الیکشن ڈیوٹی کی انجام دہی ممکن نہیں ہے۔ ڈسٹرکٹ ریٹرننگ افسران نے بھی الیکشن کمیشن کو آگاہ کیا کہ پولنگ اسٹاف ریلیف آپریشنز میں مصروف ہے اور نئے عملے کی تقرری فوری طور پر ممکن نہیں۔
الیکشن کمیشن کے مطابق پنجاب حکومت نے بھی ضمنی انتخابات ملتوی کرنے کی باضابطہ سفارش کی تھی۔ مزید کہا گیا ہے کہ سیلاب سے متاثرہ علاقوں میں نہ صرف انفرااسٹرکچر تباہ ہوا ہے بلکہ بڑی تعداد میں ووٹرز بھی بے گھر ہیں، اس لیے ان کا حق رائے دہی استعمال کرنا ممکن نہیں رہا۔
کمیشن نے اعلان کیا ہے کہ جیسے ہی حالات معمول پر آئیں گے، انتخابات کے شیڈول کا دوبارہ اعلان کیا جائے گا۔
