راشن کارڈ کی تقسیم، ریکوری اور لیبر اتھارٹی کے قیام پر صوبائی وزیر محنت فیصل ایوب کھوکھر کی زیر صدارت اہم اجلاس
لاہور 01 ستمبر 2025:صوبائی وزیر محنت و افرادی قوت ملک فیصل ایوب کھوکھر کی زیر صدارت راشن کارڈ کی تقسیم، ریکوری اور پنجاب لیبر اتھارٹی کے قیام کے حوالے سے اہم اجلاس منعقد ہوا۔ اجلاس میں سیکرٹری لیبر نعیم غوث، کمشنر پنجاب سوشل سکیورٹی محمد علی، ڈی جی لیبر ویلفئر کلثوم حئی اور دیگر افسران نے شرکت کی۔ صوبائی وزیر کو بریفنگ دی گئی کہ راشن کارڈ کی تقسیم کا سلسلہ تیزی سے جاری ہے، اسپیشل مانٹیرنگ یونٹ کارڈ کی تقسیم کی نگرانی کر رہا ہے اور صوبہ بھر میں 28 ہزار مختص دکانوں پر ورکرز کو راشن مل رہا ہے۔ مزید بریفنگ دی گئی کہ پنجاب سوشل سکیورٹی نے 31 ارب سے زائد کی تاریخی ریکوری کی جو ریکوری ہدف سے 5 فی صد زائد ہے۔ بتایا گیا کہ پنجاب سوشل سکیورٹی سے رجسڑڈ ورکرز کی تعداد ساڑھے بارہ لاکھ سے بڑھ کر 13 لاکھ 70 ہزار ہو گئی ہے۔ اجلاس میں بریفنگ دی گئی کہ سرگودھا، لاہور گلبرگ، حسن ابدال، راولپنڈی اور سیالکوٹ ڈائریکٹوریٹس نے عمدہ کام کیا ہے۔ صوبائی وزیر کو پنجاب لیبر اتھارٹی کے قیام پر پیش رفت بارے بھی بریفنگ دی گئی اور بتایا گیا کہ ڈائریکٹوریٹ آف لیبر ویلفئر کو اتھارٹی میں تبدیل کرنے کے لئے ورکنگ جاری ہے۔ صوبائی وزیر محنت و افرادی قوت پنجاب ملک فیصل ایوب کھوکھر نے کہا کہ پنجاب کے مزدوروں کی فلاح و بہبود کے لئے تاریخی اقدامات کئے جا رہے ہیں اور بہترین کام کرنے والے افسران کی ہر فورم پر حوصلہ افزائی کی جائے گی۔
