حالت جنگ ہو یا امن، پاک فوج عوام کے ساتھ ہے ، ترجمان پاک فوج کی سیلابی صورتحال پر گفتگو

ڈی جی آئی ایس پی آر احمد شریف چوہدری نے کہا ہے کہ پنجاب، خیبرپختونخوا اور آزاد کشمیر میں فلڈ یونٹس کام کررہے ہیں، ایک انجینئر بریگیڈ، 19 انفٹنری،7 انجینئرنگ کی یونٹس کام کررہی ہیں، آرمی کے ہیلی کاپٹرز 26 پروازیں کرچکے ہیں۔

انہوں نے کہا کہ حالت جنگ ہو یا امن، پاک فوج عوام کے ساتھ ہے۔

انہوں نے کہا کہ گجرانوالہ میں 6 انفنٹری کی یونٹس اور 2 انجئیرنگ کی یونٹس تعینات ہیں۔

ڈی جی آئی ایس پی آر کے مطابق بہاولپور اور بہاولنگر میں 4 یونٹس کو اسٹینڈ بائی رکھا گیا ہے، خیبرپختونخوا میں بھی یونٹس اور میڈیکل بٹالین موجود ہیں۔

لیفٹیننٹ جنرل احمد شریف چوہدری نے کہا کہ آرمی انجینئر اور سول انتظامیہ نے تمام سڑکیں کلیئر کی ہیں، 104 سڑکیں کلیئر کردی گئی ہیں اورشاہراہ قراقرم بھی کھول دی گئی ہے۔

انہوں نے کہا کہ کرتار پور میں ایک بڑا ریسکیو آپریشن جاری ہے، سیلاب متاثرین میں 225 ٹن راشن تقسیم کیا جاچکا ہے، 20 ہزار سے زائد لوگوں کو میڈیکل کی سہولت فراہم کی گئی، گلگت بلتستان اور آزاد کشمیر میں بھی ائیر ریلیف آپریشن کیے گئے ہیں ۔