کوئٹہ کے جان محمد روڈ پر بم دھماکا، 9 افراد زخمی

کوئٹہ میں جان محمد روڈ پر بم دھماکے میں 9 افراد زخمی ہوگئے، واقعے کے بعد ٹراما سینٹر اور سول اسپتال میں ایمرجنسی نفاذ کردی گئی ہے اور اضافی طبی عملے کو طلب کرلیا گیا ہے۔

کوئٹہ کی جان محمد روڈ پر دھماکا ہوا ہے۔ ابتدائی اطلاعات کے مطابق دھماکے میں 9 افراد زخمی ہوئے ہیں، زخمیوں کو طبی امداد کے لیے سول اسپتال منتقل کردیا گیا ہے۔

واقعے کے بعد ٹراماسینٹر اور سول اسپتال میں ایمرجنسی نفاذ کرتے ہوئے اضافی طبی عملے کو طلب کرلیا گیا ہے۔

دریں اثنا، بلوچستان میں قومی شاہراہوں پر دفعہ 144 نافذ کردی گئی ہے، وزیراعلٰی بلوچستان کی زیرصدارت امن وامان کی صورتحال سے متعلق اجلاس منعقد ہوا۔

ترجمان بلوچستان حکومت شاد رند کے مطابق وزیراعلیٰ کو یکم جنوری سےاب تک76 مرتبہ قومی شاہراہوں کی بندش کےحوالےسےآگاہ کیا گیا۔

انہوں نے کہا کہ بلوچستان میں قومی شاہراہوں پردفعہ 144 نافذ کردی گئی ہے جبکہ وزیراعلیٰ نے ضلعی انتظامیہ کو رات 9 بجے تک تمام شاہراہیں بحال کرنے کی ہدایت کردی ہے۔

شاہد رند نے بتایا کہ وزیراعلیٰ کے احکامات پر عملدرآمد نہ کروانے پر ضلعی افسران کے خلاف کارروائی ہوگی، احتجاج کرنا عوام کا حق ہے مگر قومی شاہراہوں کو بلاک کرنے کی اجازت کسی کو نہیں ہوگی۔