حبیب اللہ قمر
پاکستان سمیت دنیا بھر سے لاکھوں عازمین حج سعودی عرب پہنچ گئے ہیں۔ مملکت سعودی عرب کی اعلیٰ قیادت کی ہدایات کی روشنی میں ادارہ امور حرمین حج سیزن کی کامیابی کے لیے ہر طرح سے کوشاں ہے۔ ادارہ امور حرمین کی جانب سے عازمین حج کی بہتر خدمت کے لئے پہلے سے مقررہ منصوبوں پر عمل کیا جارہا ہے جس کا مقصد عازمین کو حرمین شریفین میں بہترین ماحول کی فراہمی کو یقینی بنانا ہے۔ ادارہ امور حرمین شریفین کے نگران اعلیٰ ڈاکٹر عبدالرحمٰن السدیس کا کہنا ہے کہ عازمین کی خدمت کیلیے جدید ٹیکنالوجی کا استعمال کرتے ہوئے ڈیجیٹل پلیٹ فارمز کی سہولت بھی مہیا کی گئی ہے جن کے اہم پروگراموں میں مختلف زبانوں کے ماہر افراد کو متعین کیا گیا ہے جو عازمین کے مسائل کے حل ان کی اپنی زبان میں فراہم کرتے ہیں۔ اسی طرح اسمارٹ روبوٹس جو انتہائی حساس ڈیجیٹل اسکرینز سے لیس ہیں کی سہولت بھی مہیا کی گئی ہے۔ حرمین میں دینی امور کے ادارے کی جانب سے عازمین حج و عمرہ زائرین کے لیے مصنوعی ذہانت کا استعمال کرتے ہوئے مزید کئی مختلف سہولتیں فراہم کی گئی ہیں جن میں ترجمہ کی سہولت بھی شامل ہے۔ سعودی وزارت حج و عمرہ کا کہنا ہے کہ ضیوف الرحمٰن کی سہولت کے لیے کئی ارب ریال خرچ کئے گئے ہیں۔وزارت حج نے حجاج کرام کی آمدروفت منظم کرنے کے لئے حج مشنوں اور معلمین کے ساتھ منظم منصوبہ بندی مرتب کی ہے۔خادم الحرمین شریفین شاہ سلمان بن عبدالعزیز کی دعوت میں اسرائیلی جارحیت کے نتیجہ میں شہید یا زخمی ہونے والے فلسطینی خاندانوں کے مزید ایک ہزار افراد شاہی مہمان کے طور پر حج کی سعادت حاصل کریں گے۔ یوں اس سال فلسطین سے فریضہ حج کی ادائیگی کے لیے آنے والے شاہی مہمانوں کی تعداد دو ہزار ہوگئی ہے۔ قبل ازیں شاہ سلمان بن عبدالعزیز نی دنیا بھر کے 88ممالک کے دو ہزار 322افراد کو خصوصی دعوت پر فریضہ حج کے لیے مدعو کیا تھا جن کی آمد کا سلسلہ جاری ہے۔ سعودی وزیر اسلامی امور ڈاکٹر عبداللطیف بن عبدالعزیز آل الشیخ نے مزید فلسطینیوں کو شاہی مہمان کے طور پر حج کرانے کے احکامات پر خادم حرمین شریفین کا شکریہ ادا کیا ہے۔ خادم الحرمین شریفین کے مہمان پروگرام کے تحت اب تک مختلف ملکوں کے 60ہزار افراد شاہی مہمان کے طور پر فریضہ حج ادا کر چکے ہیں۔
حج بیت اللہ کی سعادت حاصل کرنے والے حجاج کرام 8ذوالحجہ کو نماز ظہر، عصر، مغرب اور عشاء اپنے اپنے اوقات میں ادا کریں گے اور 9ذوالحجہ کو نماز فجر کی ادائیگی کے بعد تلبیہ کہتے ہوئے عرفات کی جانب روانہ ہو ں گے۔ مختلف رنگ، نسل اور اقوام سے تعلق رکھنے والے لاکھوں عازمین کی جانب سے جب بلند آواز میں لبیک اللھم لبیک کی صدائیں بلند ہوتی ہیں تو اس سے ایک روح پرور منظر نظر آتا ہی۔ حجاج کرام نو ذوالحجہ کا دن عرفات میں گزاریں گے۔ ظہر و عصر کی دونوں نمازیں ظہر کے وقت اکٹھی ادا کی جائیں گی اور شام تک دعائیں کی جائیں گی۔ میدان عرفات میں شام تک کا وقت صرف دعائوں کے لئے ہی مخصوص ہے۔ اس دن کے لئے خاص طور پر دعائوں کی مقبولیت کے حوالہ سے بہت سی احادیث بیان کی گئی ہیں۔ میدان عرفات میں سورج غروب ہونے تک حجاج کرام دعا، ذکر و اذکار اور قرآن پاک کی تلاوت میں مصروف رہتے ہیں۔9ذوالحجہ کو سورج غروب ہونے کے بعد یہاں نماز مغرب کی ادائیگی کی بجائے لاکھوں حجاج کرام مزدلفہ کی طرف روانہ ہوتے ہیں۔ وہاں پہنچ کر نماز مغرب کے تین فرض اور عشاء کے دو فرض ایک اذان اور دو اقامتوں کے ساتھ ادا کیے جائیں گے جس کے بعد نماز فجر تک آرام کا حکم ہے۔ دس ذوالحجہ کے دن حجاج کرام پھر فجر کی نماز مزدلفہ میں ادا کریں گے اور قبلہ رخ کھڑے ہو کر خوب دعائیں مانگی جائیں گی۔ اس کے بعد صبح کی روشنی پھیلنے پر سورج نکلنے سے پہلے حجاج کرام منیٰ کی طرف جائیں گے جہاں بڑے جمرہ کو سات کنکریاں ماری جائیں گی۔حجاج کرام کنکریاں جہاں سے چاہیں اٹھا سکتے ہیں ، کنکریاں مارتے وقت منہ جمرہ کی طرف رکھا جائے گااور پھر بیت اللہ کو اپنے بائیں طرف جبکہ منیٰ کو دائیں طرف رکھ کر سات کنکریاں مارتے ہوئے ہر کنکری پر اللہ اکبر کہا جائے گا۔یہ کنکریاں سورج نکلنے کے بعد ماری جاتی ہیں۔ اس کے بعد قربانی اور پھر سر منڈوا دیا جائے گا۔ خواتین اپنی انگلی کے برابر بال کاٹیں گی۔ حجاج کرام دس ذوالحجہ کو ہی طواف اضافہ ( طواف زیارت) کریں گے اور اسی طرح 11اور12ذوالحجہ کو دیگر مناسک کی ادائیگی کی جائے گی۔
سعودی حکومت کی جانب سے عازمین حج کے لیے خصوصی انتظامات کے تحت اسمارٹ ایپلی کیشنز اور ای پلیٹ فارمز متعارف کرائے گئے ہیں تاکہ زائرین آسانی سے مسجد الحرام میں اپنا وقت گزار سکیں۔ انتظامیہ کی طرف سے ہر روز آب زمزم کی لاکھوں بوتلیں زائرین کودی جارہی ہیں جبکہ ہزاروں کی تعداد میں زمزم کولرز مسجد الحرام کے تمام حصوں میں رکھے گئے ہیں۔ اسی طرح آب زمزم کی سبیلیں لگائی گئی ہیں اور موبائل گاڑیوں کا بھی بندوبست کیا گیا ہے۔ بوڑھے اور معذور عازمین حج کے لیے بڑی تعداد میں الیکٹرانک وہیل چیئرز کا بندوبست کیا گیا ہے۔ زائرین کو دینی اور حج آگہی فراہم کرنے کے لیے درس اور مذہبی استفسارات کے جواب دینے کا بھی بندوبست کیا گیا ہے۔ مسجد الحرام میں علمی لیکچرز اور دینی وعظ کا مختلف زبانوں میں ترجمہ پیش کیا جارہاہے۔ خطبہ عرفات کا فوری ترجمہ مختلف زبانوں میں دنیا بھر میں نشر کیا جائے گا۔ سعودی حکومت کی طرف سے گزشتہ برسوں کی طرح امسال بھی حجاج کرام کی سیکیورٹی، کسی قسم کی بھگدڑ کی صورتحال پیدا نہ ہونے ، صفائی ستھرائی اور دیگر امور کے حوالہ سے بہترین انتظامات کئے گئے ہیں جس پر کوئی شخص حجاج کرام کی خدمت کے لئے سعودی حکومت کے جذبہ کو داد دیئے بغیر نہیں رہ سکتا۔ حجاج کرام کے استقبال ، ان کی سلامتی اور اپنے ملکوں کو واپسی تک سکیورٹی پلان کے ذریعے تمام فورسز کو ہائی الرٹ رکھا جاتا ہے۔ اگر کوئی حجاج کے امن و سلامتی کے لیی خطرہ بننے کی کوشش کرے تو اس سے آہنی ہاتھوں سے نمٹا جاتا ہے۔ سعودی عرب کی وزارت حج کی جانب سے طواف کے نگران اداروں کے ساتھ مل کر ایام حج کے دوران رمی جمرات کا شیڈول بھی جاری کیا جاتا ہے تاکہ شدید رش کے باعث کسی قسم کی ناخوشگوار صورت حال سے بچا جاسکے۔
مکہ مکرمہ سے حجاج کرام کو منیٰ پہنچانے کے لئے ہزاروں بسوں کو اجازت نامے جاری کئے گئے ہیں جبکہ رش سے بچنے کے لئے چھوٹی گاڑیوں کا داخلہ وہاں ممنوع قرار دیا گیا ہے۔ سعودی سیکورٹی فورسز کے ہزاروں اہلکار اور رضاکار سیکیورٹی کا فریضہ سر انجام دیں گے۔ ہیلی کاپٹرز کے ذریعہ تمام راستوں اور اجتماع کی مکمل نگرانی کی جائے گی۔ مکہ مکرمہ میں حجاج کی آمدورفت کی سہولت کے لئے شاہ سلمان بند عبدالعزیز کے حالیہ دور حکومت میں درجنوں کی تعداد میں نئی سرنگیں کھودی گئی ہیں جس سے مکہ میں سرنگوں کی تعداد60سے زائد ہو گئی ہے۔ نئی تیار کی گئی سرنگوں کی مدد سے دنیا بھر سے حج کے لئے آنے والے لاکھوں افراد کے لئے بہت زیادہ سہولیات پیدا ہو گئی ہیں۔ حج کے موقع پرعازمین حج کی خدمت کے لیے وزارت انصاف کے درجن سے زائد ذیلی شعبے چوبیس گھنٹے کی بنیاد پر اپنی خدمات مہیا کریں گے۔ رواں موسم حج کے موقع پر محکمہ انصاف کی جانب سے حجاج کرام کی مکہ مکرمہ کی حدود کے اندر اور مدینہ منورہ میں قیام کے دوران آمد و رفت کے دوران انہیں ہر ممکن قانونی رہ نمائی اور مدد فراہم کی جائے گی۔ محکمہ انصاف کے مختلف اداروں کی ٹیمیں مشاعر مقدسہ منیٰ اور عرفات میں چوبیس گھنٹے کی بنیاد پر موجود رہیں گی جو حجاج کرام کی جانب سے قربانی کے جانوروں کے حصول اور ان کی نیابت میں قربانی کا اہتمام کرنے کے ساتھ ساتھ فوت ہونے والے حجاج کرام کے سامان کی حفاظت، حجاج کی امانتوں کی حفاظت اور گم یا چوری ہونے والے سامان کی تلاش میں ان کی معاونت کریں گی۔ سعودی حکومت کی جانب سے عازمین حج و عمرہ کے لیے مکہ مکرمہ کے ساتھ ساتھ مدینہ منورہ میں بھی غیر معمولی اقدامات کیے گئے ہیں۔ حج انتظامات کے حوالے سے سعودی حکام کا کہنا ہے کہ عازمین حج کی خدمت ہمارے لیے باعث فخر ہے۔ واقعتا یہ بات حقیقت ہے کہ سعودی عرب کی جانب سے حجاج کرام کی خدمت کے لیے ہر سال پہلے کی نسبت زیادہ بہت زیادہ انتظامات کیے جاتے ہیں اور ان کی خدمت کا ہر ممکن حق ادا کرنے کی کوشش کی جاتی ہے۔ دعا ہے کہ اللہ تعالیٰ اس حوالے سے حرمین شریفین انتظامیہ کی خدمات قبول فرمائے اور ان سے دین اسلام اور عازمین حج و عمرہ کی خدمت کا زیادہ سے زیادہ کام لے۔ آمین۔
