سپریم کورٹ بار کے سالانہ انتخابات کیلئے پولنگ جاری ہے ، وکلا سیاست کے دو بڑے حریف گروپ حامد خان اور عاصمہ جہانگیر گروپ الیکشن میں میدان میں ہیں۔
تفصیلات کے مطابق وکلا کی سب سے بڑی اور طاقتور بار ایسوسی ایشن کے سالانہ انتخابات آج ہو رہے ہیں، سالانہ انتخابات کے لیے پولنگ جاری ہے، جو شام پانچ بجے تک جاری رہے گا۔
وکلا سیاست کے دو بڑے حریف گروپ حامد خان اور عاصمہ جہانگیر گروپ سپریم کورٹ بار کے الیکشن میں میدان میں ہیں، صدر کے لئے حامد خان گروپ کے میاں عبدالقدوس کا شہزاد شوکت سے مقابلہ ہیں جبکہ سیکرٹری کے لئے سلمان منصور اور علی عمران سید مدمقابل ہیں۔
انتخابات میں حامد خان گروپ کی پوزیشن انتہائی مضبوط ہے ، تاہم امیدواروں کی کامیابی کا حتمی اعلان تین نومبر کو کیا جائے گا۔
حامد خان کا کہنا ہے کہ یہ الیکشن دو بیانیوں کا مقابلہ ہے، آئین کی سربلندی کے لئے کام کرتے رہیں گے جبکہ عابد زبیری کا کہنا تھا کہ میاں عبدالقدوس کے ساتھ کھڑے ہونے والے ہی قانون کی حکمرانی کے ساتھ کھڑے ہوں گے، سوچ سمجھ کے ووٹ ڈالیں۔
سپریم کورٹ بار ایسوسی ایشن کے سالانہ انتخابات کا اصل مقابلہ تو روایتی طور پر لاہور میں ہوگا ، جہاں سب سے زیادہ ووٹر ہیں، سندھ کے 6 سو57 وکلا ووٹر کراچی، حیدرآباد اور سکھرمیں اپناووٹ کاسٹ کریں گے۔
سندھ سے ناٸب صدر کی ایک نشست ہے، جس پر تین خواتین عابدہ پروین چنڑ، سیفی علی خان، سمیہ فیض درانی اور صفدرکھوکھرکے درمیان مقابلہ ہے جبکہ ایگزیکٹوکمیٹی کی دو نشستوں پر4 امیدوار عبدالقارر لغاری، دلبر خان لغاری، منہاج السلام فاروقی اور محمدوسیم شاہ میدان میں ہیں۔
سپریم کورٹ رجسٹری کے اردگرد سیکیورٹی کے سخت انتظامات کئے ہیں ، غیر متعلقہ افراد کو سپریم کورٹ رجسٹری کی جانب جانے کی اجازت نہیں۔
