گزشتہ روز سرحد کے پار کروڑوں شائقین اس وقت شدید مایوسی کا شکار ہوگئے جب پاک بھارت میچ بارش کی وجہ سے بے نتیجہ ختم ہوگیا۔ اب پاکستان کرکٹ بورڈ کے سابق سربراہ نجم سیٹھی نے ایشیا کپ میں پاک بھارت میچ بے نتیجہ ختم ہونے پر سخت مایوسی کا اظہار کیا ہے اور ساتھ ہی ساتھ نیا پنڈورا باکس کھول دیا ہے۔
ایک بیان میں نجم سیٹھی کا کہنا تھا کہ کرکٹ کا سب سے بڑا میچ بارش سے متاثر ہونا مایوس کن ہے، سری لنکا میں ان دنوں بارشوں کا ہمیشہ خدشہ رہتا ہے۔
نجم سیٹھی کا کہنا تھا کہ بطور پی سی بی سربراہ اے سی سی کو کہا تھا کہ میچز یو اے ای میں کر لیں لیکن سری لنکا کو ایونٹ دینے کے لیے مختلف بہانے بنائےگئے تھے اور کہا گیا کہ یو اے ای میں گرمی ہوگی۔
نجم سیٹھی کا کہنا تھا کہ یو اے ای میں ویسا ہی موسم ہوتا جیسا آئی پی ایل یا پچھلے ایشیاکپ میں تھا۔
ان کا کہنا تھا کہ کھیلوں پر سیاست کو ترجیح دینا ناقابل معافی عمل ہے۔
