سود کے خاتمے اور اسلامی بینکاری کے لیے وفاقی شریعت عدالت کے فیصلے پر عملدرآمد کے لیے حکومت نے سٹیئرنگ کمیٹی قائم کردی۔
اس حوالے سے وفاقی وزارت خزانہ کے مطابق سٹیئرنگ کمیٹی کی سرپرستی وزیر خزانہ اسحاق ڈار کریں گے۔ سٹیئرنگ کمیٹی کے چیئرمین گورنر سٹیٹ بینک ہوں گے۔ وزارت خزانہ کے مطابق سیکرٹری خزانہ، چیئرمین ایس ای سی پی، چیئرمین پاکستان بینکس ایسوسی ایشن اور ڈپٹی گورنر سٹیٹ بینک کمیٹی کے رکن ہوں گے۔
وزارت خزانہ کے مطابق سٹیئرنگ کمیٹی کے دیگر اراکین میں مولانا مفتی تقی عثمانی ، مفتی ارشاد احمد اعجاز ، منصور الرحمان ، اشفاق تولہ ، خوزم اے حیدر موتا اور سابق گورنر سٹیٹ بینک سعید احمد شامل ہیں۔
وزارت خزانہ کے مطابق سٹیئرنگ کمیٹی قانونی اور ریگولیٹری ریفارمز میں رہنمائی دے گی۔
