قومی اسمبلی کے سپیکر راجہ پرویز اشرف نے انکشاف کیا ہے کہ تحریک انصاف کے ارکان قومی اسمبلی فون کرکے استعفے قبول نہ کرنے کا کہتے ہیں۔
لاہور میں میڈیا سے گفتگو میں راجہ پرویز اشرف کا کہنا تھا کہ پاکستان کے تمام چیلنجز پر قابو پانے کا فورم صرف پارلیمان ہے ، تمام سیاسی جماعتوں کو معیشت کو سہارا دینے کیلئے حصہ لینا ہو گا ، ہمیں قانون سازی کرنا اور قانون کی عملداری قائم کرنی ہے۔
انہوں نے کہا کہ استعفے منظور کرنے کے قواعد و ضوابط ہیں، اگرکوئی آکر استعفے کا بیان دے اور مجھے علم ہو کہ اس پر دباؤ ہے تو میں استعفیٰ قبول نہیں کرونگا، جب تک میری تسلی نہ ہو، میں استعفیٰ قبول نہیں کروں گا۔
سپیکر نے انکشاف کیا کہ ابھی تک پی ٹی آئی والے لاجز میں بیٹھے ہیں ، مراعات لے رہے ہیں ، یہ پیغام بھیجتے ہیں ، فون کرتے ہیں کہ ہمارا استعفیٰ قبول نہ کریں۔
ان کا کہنا تھا کہ اسمبلی مدت پوری کرتی ہے تو نظام مضبوط ہو گا ، وقت ہی کیا رہ گیا ہے؟ ویسے ہی الیکشن کاسال ہے، پانچواں سال شروع ہے، بطور اسپیکر میری خواہش ہوگی ہر اسمبلی مدت پوری کرے۔
