چیئرمین پیپلز پارٹی بلاول بھٹو زرداری نےگزشتہ روز لاہور میں ہونے والی عاصمہ جہانگیر کانفرنس میں اپنے رویے پر اظہار ندامت کیا ہے۔
میری سیاسی جماعت اور موجودہ حکومت نہ صرف انسانی حقوق بلکہ آزادی اظہار رائے پر مکمل یقین رکھتی ہے، انسانی حقوق کے پلیٹ فارم پر وفاقی وزرا، سفیر مدعو تھے، عاصمہ جہانگیر کانفرنس میں لگنے والے نعرے نامناسب تھے، چیئرمین بلاول بھٹو زرداری@BBhuttoZardaripic.twitter.com/TgEmYXvZ9L
— PPP (@MediaCellPPP) October 24, 2022
پارلیمنٹ ہاؤس میں صحافیوں سے گفتگو کرتے ہوئے بلاول کا کہنا تھا کہ میں نے جس طرح نعروں کا جواب دیا وہ نامناسب تھا، ایک وفاقی وزیر کو اِس طرح کا رویہ زیب نہیں دیتا۔
بلاول کا کہنا تھا کہ ہماری حکومت انسانی حقوق اور آزادی صحافت پریقین رکھتی ہے، انسانی حقوق پر بات کرنے کے پلیٹ فارم پر وفاقی وزراء کو بھی دعوت دی جاتی ہے، عاصمہ جہانگیر کانفرنس میں لگنے والے نعرے نامناسب تھے، ہم سب نے ملک بھر میں دہشت گردی کی آگ کا سامنا کیا ہے، ہم سب دہشت گردی کی آگ کا شکار ہوئے، ہمارا خاندان، عام شہری بھی دہشت گردی کا شکار ہوئے۔
چیئرمین پیپلز پارٹی کا کہنا تھا کہ ہماری فوج کے سپاہی دہشت گردی کے خلاف صف اول کا کردار ادا کرتے ہیں، ہماری فوج کے سپاہی دہشت گردوں کے نشانے پر ہیں، ہمیں سیاست کرتے ہوئے ضرور سوچنا چاہیےکہ نعرے لگاتے وقت شہدا کےخاندانوں کو تکلیف نہ ہو۔
ان کا کہنا تھا کہ ہمارے کارکن اور دوسری تنظیموں کے لوگ بھی نعرے لگارہے تھے، میں نے جیسے ان کا جواب دیا تھا، وہ نامناسب تھا، بہتر طریقے سے جواب دیا جاسکتا تھا۔
