بیرون ملک سے غیرقانونی رقوم کی منتقلی کے کیس میں نامزد تحریک انصاف رہنما طارق شفیع کو گرفتار کرنے کے لیے آنے والی ایف آئی اے کی ٹیم نے ان کے گھر کے باہر ڈیرا ڈال دیا۔
ایف آئی اے ذرائع کے مطابق ٹیم ممکنہ طور پر جمعہ کو عدالت سے سرچ وارنٹ لینے کے بعد گھر کی تلاشی لے گی۔
واضح رہے کہ تحریک انصاف کے لیے بیرونِ ممالک سے غیر قانونی طور پر رقوم پاکستان منتقل کرنے کے مقدمے میں نامزد سابق وزیرِاعظم عمران خان کے دست راست طارق شفیع کے گھر پر ان کی گرفتاری کے لیے گزشتہ دوپہر سٹیٹ بینک سرکل حکام نے چھاپہ مارا تھا۔
ایف آئی اے کے ذرائع کے مطابق ایف آئی اے سٹیٹ بینک سرکل کی ٹیم کے ڈی اے سکیم ون میں طارق شفیع کی رہائش گاہ پہنچی تھی، لیکن وہ رہائش گاہ پر موجود نہیں تھے۔
ایف آئی اے حکام کے مطابق سٹیٹ بینک سرکل کراچی میں اس سلسلے میں 5 اکتوبر کو ایف آئی آر نمبر 14/2022 درج کی گئی ہے۔
مقدمے میں سید عارف مسعود نقوی، پی ٹی آئی عہدے دار طارق شفیع اور محمد رفیع لاکھانی نامزد ملزم ہیں۔
رقوم کی غیر قانونی منتقلی میں شامل ملکی اور غیر ملکی کمپنیوں کو بھی ایف آئی آر میں شامل کیا گیا ہے
