اداکارہ مریم نفیس نےشہباز شریف کے وزیراعظم منتخب ہونے پر اپنے ردعمل کا اظہار کیا ہے۔
تفصیلات کے مطابق فوٹو اینڈ ویڈیو شیئرنگ ایپ انسٹا گرام پر مریم نفیس نے لکھا کہ ‘نون لیگیوں اور پٹواریوں کو مجرم وزیراعظم مبارک ہو، لیکن یہ زیادہ عرصے نہیں چلے گا۔
اداکارہ نے لکھا کہ قابلیت اتنی بڑھاؤ کہ تمہیں ہرانے کے لئے کوششیں نہیں، سازشیں کرنے پڑیں، انہوں نے سابق وزیراعظم عمران خان کو مخاطب کرتے ہوئے کہا کہ خان صاحب، ہم پاکستانی عوام آپ کو واپس لائیں گے، یہ ضروری تھا کہ کون ملک اور قوم کے لئے سچا ہے۔
مریم نفیس نے لکھا کہ اب عوام کی طاقت سے ہم آپ کو چند مہینوں میں دوبارہ لائیں گے، کیونکہ آپ ایماندار اور پاکستان کے ساتھ وفادار ہیں۔
واضح رہے کہ گذشتہ روز پاکستان بھر میں معروف شوبز شخصیات نے عمران خان کی حمایت میں ہونے والے احتجاجی مظاہروں میں شرکت کی تھی، جن میں مریم نفیس بھی پیش پیش تھیں۔
اداکارہ نے بھی کراچی میں ہونے والے مظاہرے میں شرکت کے موقع پر کہا کہ وہ نئی حکومت کو تسلیم نہیں کرتیں، نئی حکومت نے غلط طریقے سے عمران خان کو اقتدار سے نکالا، یہی وجہ ہے کہ لوگ سحری کے وقت بھی احتجاج کے لئے موجود ہیں۔
اداکارہ مریم نفیس نے بھی کراچی میں ہونے والے مظاہرے میں شرکت کی اور کہا کہ وہ نئی حکومت کو تسلیم نہیں کرتیں، نئی حکومت نے غلط طریقے سے عمران خان کو اقتدار سے نکالا ہے یہی وجہ ہے کہ لوگ سحری کے وقت بھی احتجاج کے لئے موجود ہیں۔
اس سے قبل اداکارہ مریم نفیس نے مائیکرو بلاگنگ ویب سائٹ ٹوئٹر پر تحریکِ انصاف کے رکنِ قومی اسمبلی علی محمد خان کی پارلیمنٹ میں کی گئی پر جوش تقریر اور عمران خان کا ساتھ دینے کو شاندار الفاظ میں سراہا تھا۔
