ملک میں کھانے کی ہوم ڈیلیوری اور کورئیر سروسز کے مبینہ غلط استعمال کے حوالے سے ایک تشویشناک انکشاف سامنے آیا ہے، جہاں دعویٰ کیا گیا ہے کہ منشیات کو عام کھانے کے پیکٹس میں چھپا کر صارفین تک پہنچایا جا رہا ہے۔
ایک معروف سوشل میڈیا پوڈکاسٹ میں گفتگو کے دوران میزبان نے بتایا کہ آن لائن منشیات کی دستیابی اور موجودہ نظام کی کمزوریوں کو جانچنے کے لیے ایک تجربہ کیا گیا۔ ان کے مطابق چرس کا آرڈر دیا گیا اور اس کی رقم آن لائن بینکنگ کے ذریعے منتقل کی گئی۔ دعویٰ ہے کہ بعد ازاں منشیات کو چاولوں کے دو پیکٹس میں چھپا کر ایک عام ڈیلیوری رائیڈر کے ذریعے پہنچایا گیا، جبکہ رائیڈر مبینہ طور پر اس بات سے لاعلم تھا کہ پیکج میں کھانے کے علاوہ کچھ اور بھی موجود ہے۔
پوڈکاسٹ میں مزید دعویٰ کیا گیا کہ مبینہ طور پر منشیات فروخت کرنے والے افراد آن لائن "ڈیجیٹل مینو” کے ذریعے مختلف اقسام کی منشیات کی پیشکش کرتے ہیں، جن میں چرس کے علاوہ کوکین اور ہیروئن بھی شامل ہونے کا کہا گیا۔ میزبان کے مطابق اس معاملے میں رقم کی منتقلی بھی عام بینکنگ چینل کے ذریعے ہوئی، جس سے آن لائن مالیاتی لین دین کی نگرانی کے حوالے سے سوالات پیدا ہوتے ہیں۔
میزبان نے بتایا کہ تجربے کے دوران حاصل کی گئی منشیات کو بعد میں تلف کر دیا گیا۔ تاہم، اس واقعے نے خاص طور پر تعلیمی اداروں اور ہاسٹلز کی سکیورٹی کے حوالے سے تشویش پیدا کر دی ہے، جہاں طلبہ کے لیے روزانہ کھانے اور دیگر اشیاء کی ڈیلیوری معمول کا حصہ بن چکی ہے۔
یہ معاملہ اس بات کی ضرورت اجاگر کرتا ہے کہ فوڈ ڈیلیوری، کورئیر سروسز، آن لائن ادائیگیوں اور تعلیمی اداروں کی سکیورٹی کے نظام میں موجود ممکنہ خامیوں کا جائزہ لیا جائے تاکہ ان سہولیات کو غیر قانونی سرگرمیوں کے لیے استعمال ہونے سے روکا جا سکے۔
