مال روڈ پر سکیورٹی فورسزکی جوابی فائرنگ سے دہشتگردہلاک، تعلق ایک سیاسی جماعت سے تھا:ترجمان راولپنڈی پولیس

ترجمان راولپنڈی پولیس کا کہنا ہےکہ آج دن سوا 11 بجے مال روڈ راولپنڈی میں سکیورٹی فورسز پر فائرنگ کرنے والے دہشت گرد محمد حسین کا تعلق ایک مخصوص سیاسی جماعت سے تھا۔

ترجمان کے مطابق آج دن سوا 11 بجےمال روڈ راولپنڈی میں دہشت گرد نے سکیورٹی فورسز پر فائرنگ کی، فائرنگ سے سکیورٹی فورسز کی پٹرولنگ ٹیم کا ایک اہلکار زخمی ہوگیا۔

ترجمان کے مطابق سکیورٹی فورسز نے بروقت کارروائی میں حملہ آور کو جوابی فائرنگ کرکے ہلاک کر دیا، دہشت گرد کےقبضے سے ملنے والے موبائل فون اور دیگر سامان سے مزید شواہد سامنے آئے ہیں، دہشت گرد محمد حسین کا تعلق ایک مخصوص سیاسی جماعت سے تھا۔

دوسری جانب وفاقی وزیر اطلاعات عطا اللہ تارڑ نے راولپنڈی میں مال روڈ پر سکیورٹی اہلکار پر دن دیہاڑے فائرنگ کے واقعے میں پی ٹی آئی کو ملوث قرار دے دیا۔

وفاقی وزیر اطلاعات نےکہا ہےکہ مال روڈ واقعے سے بہت سی چیزیں سامنے آگئی ہیں، پی ٹی آئی کے لوگ احتجاج میں اسلحے سے لیس ہوکر آتے ہیں ، پی ٹی آئی نے ہمیشہ تشدد کی سیاست کی ہے، پی ٹی آئی کے کسی بھی احتجاج کے پیچھے ان کا مقصد ملک میں انارکی پھیلانا ہے ، پاکستان کی ترقی پی ٹی آئی کو ہضم نہیں ہو رہی۔