سلمان خان کی طلبہ سے احتجاج ختم کرنے اور گھروں کو واپس جانے کی اپیل

بالی ووڈ اداکار سلمان خان نے بھارت میں احتجاج کرنے والے طلبہ سے اپیل کی ہے کہ وہ احتجاج ختم کرکے گھروں کو واپس چلے جائیں۔

بالی ووڈ اداکار سلمان خان نے سوشل میڈیا پر جاری اپنے بیان میں کہا ہے کہ طلبہ کی تعلیم اور سکیورٹی حکومت کی اولین ترجیح ہے، اس لیے انہیں پریشان ہونے کی ضرورت نہیں۔

سلمان خان نے کہا کہ وزیراعظم اس معاملے پر پہلے ہی بیان دے چکے ہیں اور انہیں یقین ہے کہ پرچہ لیک کے ذمہ دار افراد کے خلاف سخت کارروائی کی جائے گی۔ انہوں نے طلبہ سے اپیل کی کہ وہ احتجاج ختم کرکے اپنے گھروں کو واپس چلے جائیں۔
اداکار نے سماجی کارکن سونم وانگچک سے اپیل کرتے ہوئے کہا کہ احتجاج کو مزید نہ بڑھایا جائے اور اگر مستقبل میں ضرورت پڑی تو دوبارہ آواز اٹھائی جا سکتی ہے۔

انہوں نے سونم وانگچک سے بھوک ہڑتال ختم کرنے اور کھانا کھانے کی اپیل کرتے ہوئے اپنے گھر سے کھانا بھجوانے کی پیشکش بھی کی۔

بالی ووڈ اداکاراؤں اننیا پانڈے اور سارہ علی خان نے امتحانی پرچہ لیک معاملے پر احتجاج کرنے والے طلبہ کے حق میں بیانات جاری کرتے ہوئے ان کے مطالبات کی حمایت کی ہے۔

اننیا پانڈے نے کہا کہ نئی نسل ناانصافی کو معمول ماننے کے لیے تیار نہیں، طلبہ کسی رعایت کے لیے نہیں بلکہ انصاف کا مطالبہ کر رہے ہیں۔