پاکستان میں تباہ کن سیلاب کی صورت حال کے حوالے سے چینی وزارت خارجہ کے ترجمان ژاؤلی جیان نے کہا ہے کہ چین نے پاکستان ہنگامی بنیاد پر امداد کی اضافی کھیپ دینے کا فیصلہ کیا ہے۔عالمی موسمیاتی ردعمل میں پاکستان سے تعاون جاری رکھیں گے، چین اپنے دوست ملک کو سیلاب سے متعلق امداد اور تعمیر نو میں مزید مدد دے گا۔
ترجمان چینی وزارت خارجہ نے کہا کہ پاکستان میں تباہ کن سیلاب کی معلومات دل دہلا دینے والی ہیں، مشکل وقت میں دل کی گہرائیوں کے ساتھ پاکستان کے ساتھ ہیں۔ چین اور پاکستان ایک دوسرے کی خوشی اور غم میں شریک ہیں، ہم موسمی سٹریٹجک تعاون میں بھی شراکت دار ہیں۔
چینی وزارت وزیر خارجہ وانگ ای نے پاکستانی ہم منصب سے ہمدردی کا اظہار کیا اور بتایا کہ چین نے پاکستان کو 4 ہزار خیمے، 50 ہزار کمبل، 50 ہزار ترپالیں فراہم کی ہیں، ہم نے ہنگامی انسانی امداد کی اضافی کھیپ دینے کا بھی فیصلہ کیا ہے۔چینی ریڈ کراس پاکستان ریڈ کریسنٹ کو 3 لاکھ امریکی ڈالر نقد دے گی۔
آل پاکستانی چائنیز انٹرپرائزز ایسوسی ایشن نے سیلاب ریلیف فنڈ میں ڈیڑھ کروڑ روپے عطیہ دیا، چینی سفارتخانہ پاکستان میں اور پاکستانی سفارتخانہ چین میں فنڈریز کے لیے رابطے میں ہے۔پاکستانی اس آفت پر قابو پالیں گے اور جلد ہی اپنے گھر دوبارہ تعمیر کریں گے ۔
