تحریک انصاف کے قومی اسمبلی میں دیے گئے استعفوں کے معاملے پر اسمبلی رولز آف بزنس لاہور ہائی کورٹ میں چیلنج کردیے گئے۔
لاہور ہائی کورٹ میں درخواست گزار فرید عادل ایڈووکیٹ نے اراکین اسمبلی کے استعفوں کی نوعیت کی جانچ کے لیے بنائے گئے اسمبلی رولز آف بزنس چیلنج کیے۔
عدالت عالیہ میں دائر درخواست میں وزارت پارلیمانی امور، سپیکر قومی اسمبلی اور الیکشن کمیشن آف پاکستان کو فریق بنایا گیا ہے۔
درخواست میں موقف اختیار کیا گیا کہ اسمبلی رولز آف بزنس کی دفعہ 43 میں سپیکر کو اراکین کے استعفوں کی نوعیت جانچنے کا اختیار دیا گیا ہے۔قومی اسمبلی رولز آف بزنس کی دفعہ 43 آئین سےتجاوز کر رہی ہے، یہ دفعہ مکمل طور پر غیر متعلقہ اور غیر ضروری ہے۔
درخواست میں موقف اختیار کیا گیا کہ آئین قومی اسمبلی کو یہ اختیار نہیں دیتا کہ کسی رکن اسمبلی کے استعفے کی نوعیت کو جانچے، سپیکر قومی اسمبلی کسی بھی رکن کے استعفے کی نوعیت کی تحقیقات بھی کروانے کا مجاز نہیں۔
درخواست گزار نے موقف اپنایا کہ اسمبلی رکنیت سے مستعفی ہونے کے لیے رکن کا ہاتھ سے لکھا استعفیٰ ہی آئین کا تقاضا ہے، اس لیے سپیکر قومی اسمبلی کو زیر التوا استعفوں کو فوری منظور کرنے کا حکم دیا جائے۔
درخواست میں استدعا کی گئی کہ سپیکر قومی اسمبلی کو ہاتھ کے بغیر لکھے گئے استعفوں کو فوری طور واپس کرنے کا حکم دیا جائے اور قومی اسمبلی رولز آف بزنس کی دفعہ 43 کی ذیلی شق 2 غیر آئینی قرار دی جائے۔
