پی ٹی آئی کے جنرل سیکریٹری اسد عمر نے شوکت ترین کی پنجاب اور خیبرپختونخوا کے وزرائے خزانہ سے ٹیلی فونک بات چیت پر رد عمل دیا ہے۔
اسلام آباد پریس کانفرنس میں اسد عمر نے کہا ہے کہ اگر شوکت ترین نے محسن لغاری اور تیمور جھگڑا سے بات کی ہے تو کون سی غلط بات ہے، شوکت ترین نے پنجاب اور کے پی کے وزیرخزانہ کو کہا کہ وفاق کو کہو کہ ہمارے پاس سیلاب آ گیا ہے ۔ شوکت ترین نے دونوں وزرائے خزانہ کو کہا کہ وفاق کو کہیں کہ ہمارے پاس سرپلس نہیں، شوکت ترین کی آڈیو میں کٹ پیسٹ کی گئی ہے، یہ کام پہلے بھی یہ کرتے رہے ہیں۔
پی ٹی آئی رہنما کا کہنا تھا کہ تیمور جھگڑا نے وفاقی حکومت کو لکھا کہ کچھ اقدامات ہیں جو وفاق کو کرنے پڑیں گے، خیبرپختونخوا کے وزیرخزانہ کو دو مہینے ملاقات کا وقت نہیں دیا گیا، اب جب خط لکھا تو کیسے ملاقات کا وقت نکل آیا۔
اسد عمر نے مزید کہا کہ آپ پہلے بھی سیاست کررہے تھے، پچھلے دو دن سے بھی سیاست کررہے ہیں، حقیقت ابھی تک صرف ایک خط ہے باقی سب صرف رولا ہے جو بھی بات چیت ہوئی اس کا آخری نتیجہ خط ہے۔
