نیشنل ہائی ویز اینڈ موٹروے پولیس نے سندھ میں نیشنل ہائی وے این فائیو پر بھی کئی مقامات پر سفر خطرناک قرار دے دیا ۔
ترجمان موٹروے پولیس نے بتایا ہے کہ نیشنل ہائی وے این 5 سندھ، کنڈیارو، مورو، سکرنڈ اور مٹیاری کے قریب ہٹری خطرے سے دوچار ہے جبکہ میانی فاریسٹ، چلگری، باڈیرو اور کھنڈو کے مقامات پر سیلاب کا خطرہ ہے۔شہریوں سے اپیل کی گئی ہے کہ عوام کسی بھی قسم کے سفر سے گریز کریں۔
ترجمان موٹروے پولیس کے مطابق نیشنل ہائی وے این 5، ازاخیل، نوشہرہ کے درمیان، موٹروے ایم ون برہان تا پشاور سیلاب کے خطرے سے دوچار ہے۔
موٹروے پولیس کی عوام کو سیلاب کے خطرے کے پیش نظر متاثرہ قومی شاہراہوں پر سفر نہ کرنے کی ہدایات جاری کی گئی ہے۔سیلاب کے پیش نظر قومی شاہراہوں پر افسران کو الرٹ اور چوکس رہنے کی ہدایت کی گئی ہے۔
ترجمان موٹروے پولیس نے شہریوں کو ہدایت کی ہے کہ وہ موجودہ موسمی حالات کو مدنظر رکھتے ہوئے قومی شاہراہوں پر محتاط ڈرائیونگ کریں اور سفر شروع کرنے سے پہلے موٹر وے پولیس ہیلپ لائن 130 سے معلومات حاصل کریں۔
