اسلام آباد ہائیکورٹ نے نائب صدر ن لیگ مریم نواز، وزیرداخلہ رانا ثنا اللہ اور سربراہ پی ڈی ایم مولانا فضل الرحمان کے خلاف توہین عدالت کی درخواست سماعت کے لیے مقرر کردی۔
مریم نواز، رانا ثنا اللہ اور مولانا فضل الرحمان کے خلاف درخواست مقامی وکیل علی اعجاز بٹر نے دائر کی ہے۔ جسٹس محسن اختر کیانی کل درخواست کی سماعت کریں گے۔
درخواست میں موقف اختیار کیا گیا ہے کہ سوشل میڈیا کے ذریعے معلوم ہوا کہ مریم نواز، رانا ثناء اللہ اور مولانا فضل الرحمان کو ملکی اداروں اور عدلیہ کا احترام نہیں جبکہ بدقسمتی سے یہ لوگ حکومتی معاملات بھی چلا رہے ہیں۔
درخواست گزار کے مطابق فریقین نے اعلیٰ عدلیہ کے ججز کے بارے میں بار بار توہین آمیز زبان استعمال کی۔ ان بیانات کے ذریعے نظام انصاف کی ساکھ پر سوال اٹھا کرعوام کا عدلیہ سے اعتماد اٹھانے کی کوشش کی گئی ہے لہذا اُن کے خلاف کارروائی کی جائے۔
درخواست کے ساتھ مریم نواز کی 25 جولائی کی پریس کانفرنس کا ٹرانسکرپٹ بھی جمع کرایا گیا ہے۔ لیگی رہنماؤں عطا اللہ تارڑ اور مریم اورنگزیب کو بھی فریق بنایا گیا ہے۔
عدالت نے رجسٹرار آفس کے اعتراض کے ساتھ درخواست سماعت کے لیے مقرر کردی جس پر جسٹس محسن اختر کیانی کل 26 اگست کو سماعت کریں گے۔
