ریاستی اداروں سے تصادم: جمہوریت یا انتشار؟

ریاستی اداروں سے تصادم: جمہوریت یا انتشار؟
تحریر: پروفیسر وسیم آکاش
جمہوری معاشروں میں احتجاج، اختلافِ رائے اور سیاسی سرگرمیوں کو شہریوں کا بنیادی حق تسلیم کیا جاتا ہے لیکن اس حق کی حدود آئین اور قانون متعین کرتے ہیں۔ کوئی سیاسی جماعت، مذہبی تنظیم یا اس کی قیادت قانون سے بالاتر نہیں ہو سکتی۔ سیاسی اختلاف کو ریاستی اداروں کے ساتھ تصادم، سرکاری اہلکاروں کو فرائض کی انجام دہی سے روکنے اور عوامی زندگی کو مفلوج کرنے کا جواز بنانا جمہوری اقدار کے منافی ہے۔
اسلام آباد کے سیکٹر آئی نائن فور میں 7نومبر 2026ء کو پیش آنے والا واقعہ اسی تناظر میں کئی اہم سوالات اٹھاتا ہے۔ فراہم کردہ ایف آئی آر نمبر 1212؍26کے مطابق جمعیت علمائے اسلام ( ف) سے وابستہ کارکنوں پر بغیر اجازت اجتماع، سڑکوں کی بندش، پولیس اہلکاروں پر پتھرا، سرکاری گاڑیوں کو نقصان پہنچانے اور کارِ سرکار میں مداخلت کی الزامات عائد کیے گئے ہیں۔ مقدمے میں انسدادِ دہشت گردی ایکٹ کی دفعہ 7سمیت دیگر دفعات شامل ہونے کی اطلاع ہے۔ خصوصی عدالت کی جانب سے مفتی ابرار کے ناقابلِ ضمانت وارنٹ گرفتاری جاری ہونے اور پولیس کی جانب سے ان کی تعمیل کی اطلاعات بھی سامنے آئی ہیں۔یہاں بنیادی سوال کسی سیاسی جماعت کی حمایت یا مخالفت کا نہیں بلکہ قانون کی بالادستی کا ہے۔ اگر کسی احتجاج کے دوران سرکاری اہلکاروں کو ان کے فرائض سے روکا جائے، پولیس پر پتھرائو کیا جائے، سرکاری املاک کو نقصان پہنچایا جائے اور شہریوں کی نقل و حرکت متاثر ہو تو اسے محض سیاسی سرگرمی قرار دے کر نظرانداز نہیں کیا جا سکتا۔
کارِ سرکار میں مداخلت محض ایک قانونی خلاف ورزی نہیں بلکہ ریاستی نظم و نسق اور عوامی تحفظ کے لیے بھی سنگین مسئلہ ہے۔ پولیس اہلکار جب امن و امان برقرار رکھنے، شہریوں کی حفاظت اور قانون نافذ کرنے کے لیے میدان میں موجود ہوں تو انہیں سیاسی کارکنوں کے دبا، دھمکیوں یا تشدد کا سامنا نہیں ہونا چاہیے۔ سرکاری ملازمین کو ان کے فرائض سے روکنا درحقیقت ریاستی اختیار کو چیلنج کرنے کے مترادف ہے۔ اگر کوئی شخص قانون نافذ کرنے والے اداروں کے سامنے مزاحمت کرے، سرکاری گاڑیوں کو نقصان پہنچائے یا اسلحے کے زور پر سرکاری امور میں رکاوٹ ڈالے تو اس کے خلاف بلاامتیاز قانونی کارروائی ہونی چاہیے۔
اس ضمن میں یہ امر بھی قابلِ توجہ ہے کہ احتجاج کے دوران سڑکیں بند کرنے کا سب سے زیادہ نقصان عام شہریوں کو اٹھانا پڑتا ہے۔ مریضوں کو ہسپتال پہنچنے میں مشکلات، طلبہ کو تعلیمی اداروں تک رسائی میں دشواری، ملازمین کو دفاتر پہنچنے میں پریشانی اور کاروباری سرگرمیوں میں تعطل پیدا ہوتا ہے۔ سوال یہ ہے کہ سیاسی مقاصد کے حصول کے لیے عام شہریوں کو مشکلات میں ڈالنے کا اختیار کسی جماعت یا تنظیم کو کس نے دیا ہے؟ عوامی شاہراہیں کسی سیاسی جماعت کی ملکیت نہیں بلکہ تمام شہریوں کا مشترکہ حق ہیں۔ جمعیت علمائے اسلام ( ف) ایک مذہبی و سیاسی جماعت ہے جس کی قیادت مولانا فضل الرحمان کے پاس ہے۔ اس جماعت کی سیاسی تاریخ، پارلیمانی کردار اور مذہبی اثر و رسوخ اپنی جگہ اہمیت رکھتے ہیں لیکن مذہبی شناخت کسی کو قانون سے استثنا فراہم نہیں کرتی۔ مذہب کے نام پر سیاست کرنے والوں پر تو اخلاقی اور سماجی ذمہ داری مزید بڑھ جاتی ہے کہ وہ اپنے کارکنوں کو قانون کی پاسداری، برداشت اور پُرامن سیاسی جدوجہد کا درس دیں۔ اگر کسی جماعت کے کارکن قانون ہاتھ میں لیتے ہیں تو قیادت کو بھی اس طرزِعمل کی وضاحت کرنی چاہیے۔
مولانا فضل الرحمان جیسے سینئر سیاسی رہنما سے توقع کی جاتی ہے کہ وہ اپنے ساتھیوں کو تصادم کے بجائے آئینی اور قانونی راستہ اختیار کرنے کی تلقین کریں گے۔ سیاسی اختلاف کا جواب دلیل، پارلیمانی جدوجہد اور مذاکرات سے دیا جانا چاہیے، نہ کہ سرکاری اداروں کے ساتھ محاذ آرائی سے۔ دوسری جانب جے یو آئی ( ف) کی جانب سے پولیس کارروائیوں اور مقدمات کو سیاسی انتقام قرار دینے کے مقف کو بھی نظرانداز نہیں کیا جا سکتا۔ حکومت کی ذمہ داری ہے کہ وہ ہر کارروائی کو شفاف، غیر جانب دار اور قانونی تقاضوں کے مطابق یقینی بنائے۔ مفتی ابرار کے خلاف ناقابلِ ضمانت وارنٹ گرفتاری کا اجرا اور پولیس کی جانب سے ان کی تعمیل عدالتی عمل کا حصہ ہے۔ اب ضروری ہے کہ متعلقہ ملزم عدالت کے سامنے پیش ہو اور اپنا موقف بیان کرے تاہم مقدمے کا فیصلہ شواہد کی بنیاد پر ہو۔ کسی بھی ملزم کو جرم ثابت ہونے سے پہلے مجرم قرار دینا درست نہیں لیکن عدالتی احکامات سے انحراف بھی کسی صورت قابلِ قبول نہیں ہونا چاہیے۔
پاکستان اس وقت دہشت گردی، معاشی مشکلات اور داخلی و خارجی چیلنجز سے نبردآزما ہے۔ ایسے حالات میں سیاسی جماعتوں اور ریاستی اداروں کے درمیان تصادم قومی مفاد میں نہیں۔ ریاست کی رٹ کا تحفظ حکومت کی ذمہ داری ہے اور قانون کی پابندی ہر شہری کا فرض عین ہے ۔ احتجاج ضرور کیجیے، اختلاف ضرور رکھیے، حکومت پر تنقید بھی کیجیے، لیکن قانون کو اپنے ہاتھ میں لینے اور کارِ سرکار میں مداخلت کرنے کا کوئی جواز نہیں۔ جمہوریت میں طاقت کا اصل سرچشمہ قانون، دلیل اور عوامی اعتماد ہوتا ہے ۔ سڑکوں کی بندش، پتھرائو اور سرکاری اہلکاروں کو دھمکانا نہیں ہوتا۔ ریاستی رٹ کا احترام ہی ایک مہذب، مضبوط اور مستحکم پاکستان کی بنیاد ہے۔





