انسداد دہشت گردی کی خصوصی عدالت نے فیصل آباد میں 9 مئی کو رانا ثنا اللہ کے گھر پر حملے اور توڑ پھوڑ کے مقدمے کا فیصلہ سنا دیا۔ عدالت نے 59 ملزمان کو 10، 10 سال قید کی سزا سنائی ہے جبکہ 16 افراد کو 3، 3 سال قید کی سزائیں دی گئی ہیں۔ اس کے ساتھ ہی 34 ملزمان کو بری کر دیا گیا۔
فیصلے کے مطابق جن پی ٹی آئی رہنماؤں کو 10 سال قید کی سزا سنائی گئی ان میں عمر ایوب، شبلی فراز، زرتاج گل اور کنول شوزب سمیت دیگر شامل ہیں۔ دوسری جانب فواد چوہدری اور زین قریشی ان 34 افراد میں شامل ہیں جنہیں بری کیا گیا۔
مجموعی طور پر عدالت کی جانب سے 75 افراد کو مختلف سزائیں سنائی گئیں، اور تمام فیصلے ملزمان کی غیر موجودگی میں سنائے گئے۔
یاد رہے کہ 9 مئی 2023 کے واقعات کے دوران فیصل آباد میں جلاؤ گھیراؤ اور توڑ پھوڑ کے چار مقدمات درج کیے گئے تھے۔ ان میں سے تین مقدمات کا فیصلہ پہلے ہی سنایا جا چکا تھا، جبکہ رانا ثنا اللہ کے گھر پر حملے کا یہ چوتھا مقدمہ سمن آباد تھانے میں درج کیا گیا تھا، جس میں پی ٹی آئی کی مرکزی قیادت سمیت 109 افراد کو نامزد کیا گیا تھا۔
