7 جولائی کو وزیراعلیٰ پنجاب مریم نواز کے صاحبزادے جنید صفدر کی سکیورٹی پر مامور گاڑی کو کالے شیشے لگانے کی خلاف ورزی پر ٹریفک پولیس نے چالان کیا۔ یہ کارروائی معمول کی چیکنگ کے دوران کی گئی تھی۔
واقعے پر ردعمل دیتے ہوئے جنید صفدر نے منگل کے روز انسٹاگرام پر اسٹوری شیئر کی اور قانون کے مطابق کارروائی پر ٹریفک پولیس کی تعریف کی۔ انہوں نے لکھا کہ پنجاب پولیس کے وہ تمام اہلکار جنہوں نے میری گاڑی روکی اور چالان کیا، ان کا پیشہ ورانہ رویہ قابلِ تحسین ہے۔ اللہ آپ کو ڈیوٹی پر اور اس کے بعد بھی محفوظ رکھے۔
خیال رہے کہ گاڑی پر کالے شیشے لگے ہونے کی وجہ سے چالان کیا گیا تھا۔
دوسری جانب وزیراعلیٰ پنجاب مریم نواز نے بھی پولیس ٹیم کی کارکردگی کو سراہا تھا اور چالان کرنے والی ٹیم کو شاباش دی تھی۔
انہوں نے پولیس ٹیم کے انچارج شاہ زیب، اہلکاروں پرویز،حیدر اور مجاہد کو شاباش دیتے ہوئے کہا کہ آپ نے قانون کی پاسداری کو یقینی بنایا، قانون کی بالادستی ہی ہماری حکومت کی پہچان ہے، پورے پنجاب میں قانون کا یکساں نفاذ اور پاسداری دیکھنا چاہتی ہوں۔
