صدرِ پاکستان نے 26ویں آئینی ترمیم کے بل پر دستخط کر دیے، گزٹ نوٹیفکیشن جاری

صدرِ پاکستان آصف علی زرداری نے سینیٹ اور قومی اسمبلی سے منظوری کے بعد 26ویں آئینی ترمیم کے بل پر دستخط کر دیے ہیں۔

صدرِ پاکستان کی جانب سے 26 ویں آئینی ترمیم کے بل پر دستخط کے بعد اس کا گزٹ نوٹیفکیشن جاری کردیا گیا ہے۔ جس کے بعد اب یہ ترمیم فوری طور پر نافذ العمل ہو گئی ہے۔

واضح رہے کہ کابینہ کی منظوری کے بعد دونوں نے ایوانوں نے 26 ویں آئینی ترمیم کی منظوری دی جس میں حکومت نے دونوں ایوانوں میں اپنی اکثریت ثابت کی۔

کابینہ اور دونوں ایوانوں سے منظوری کے بعد وزیراعظم شہباز شریف نے دستاویز کو دستخط کے لیے صدر کو بھجوایا تھا۔

یاد رہے کہ سپیکر قومی اسمبلی ایاز صادق کی زیرِ صدارت ہونے والے قومی اسمبلی کے اجلاس میں ترمیم کی منظوری کے لیے 225 اراکین اسمبلی نے ووٹ دیے جبکہ 12 ارکان نے اس کی مخالفت کی ہے۔

تاہم چیئرمین یوسف رضا گیلانی کی زیرِ صدارت سینیٹ کے اجلاس میں وزیر قانون اعظم نذیر تارڑ نے 26ویں آئین ترمیم پر ووٹنگ کی تحریک پیش کی تھی، جسے کثرت رائے سے منظور کر لیا گیا تھا اور اس کے حق میں 65 ووٹ ڈالے گئے تھے۔