پاکستان سٹاک ایکسچینج میں شدید مندی کا رجحان، انڈیکس میں 1800 پوائنٹس سے زائد کی کمی

پاکستان سٹاک ایکسچینج میں جمعے کے روز شدید مندی کا رجحان ریکارڈ کیا گیا ہے اور کاروبار کے آغاز کے پہلے آدھے گھنٹے میں انڈیکس میں 1850 پوائنٹس کی کمی ریکارڈ کی گئی ہے۔

کاروبار کے آغاز پر انڈیکس منفی زون میں چلا گیا، جس کی وجہ سرمایہ کاروں کی جانب سے حصص کی خریداری سے زیادہ اس کی فروخت رہی جس کے بعد انڈیکس 72000 پوائنٹس کی سطح سے نیچے چلا گیا۔

پاکستان سٹاک ایکسچینج میں گذشتہ کئی روز سے مندی کا رجحان ریکارڈ کیا گیا۔ گذشتہ چار دنوں میں انڈیکس میں 2000 پوائنٹس کی کمی ریکارڈ کی گئی تھی اور جمعے کے روز انڈیکس میں مزید 1800 پوائنٹس کی کمی ریکارڈ کی گئی۔

سٹاک مارکیٹ تجزیہ کار شہریار بٹ نے بی بی سی کو بتایا کہ گذشتہ کئی دنوں سے مندی دیکھی جا رہی ہے۔ انھوں نے اس ہفتے میں انڈیکس میں چار ہزار پوائنٹس کی کمی ہوئی جس کی وجہ نئے بجٹ میں سٹاک مارکیٹ اور اس میں کاروبار پر ٹیکسوں کی اطلاعات ہیں۔

انھوں نے کہا کہ ایسی قیاس آرائیاں ہوئی ہیں جس میں سٹاک مارکیٹ میں کاروبار پر ’کیپٹل گین ٹیکس‘ اور کمپینوں کی جانب سے اپنے شیئر ہولڈرز کو دیے جانے والے منافع پر ٹیکس کی شرح بڑھانے کی اطلاعات ہیں۔

انھوں نے کہا ان خبروں کے مارکیٹ میں منفی رجحان کو جنم دیا اور سرمایہ کاروں کی جانب سے حصص کی فروخت کی جا رہی ہے۔

تاحال حکومت نے ان نئے ممکنہ ٹیکسز کے حوالے سے تفصیلات شیئر نہیں کی ہیں۔