قطر میں جاری فیفا ورلڈکپ کے پہلے سیمی فائنل میں ارجنٹائن نے کروشیا کو شکست دے کر چھٹی بار فائنل کے لیے کوالیفائی کرلیا۔
ارجنٹائن نے سیمی فائنل میں کروشیا کو تین صفر سے شکست دے دی ، ارجنٹائن کے دو گول جولین الواریز نے کیے جبکہ ایک گول لیونل میسی نے سکور کیا۔
لوسیل سٹیڈیم میں کھیلے گئے سیمی فائنل میں ابتدائی پندرہ منٹ تک زیادہ تر گیند پر کروشیا کی ٹیم کا قبضہ رہا ، پھر ارجنٹائن کے کھلاڑیوں نے اٹیکنگ مووز بنانے شروع کیے ، اسی ایک موو کے نتیجے میں ارجنٹائن کو پینالٹی کک مل گئی جس پر میسی نے گول کردیا۔
میسی ورلڈ کپ مقابلوں میں ارجنٹائن کے لیے سب سے زیادہ 11 گول کرنے والے کھلاڑی بن گئے۔
ارجنٹائن کا دوسرا گول 22 سالہ الواریز نے سکور کیا جو تنہا اپنے ہاف سے گیند کو لے کر چلے اور کروشیا کے جال میں پہنچا کر آئے، پہلے ہاف تک مقابلہ دو صفر سے ارجنٹائن کے حق میں تھا۔
دوسرے ہاف میں الواریز نے ارجنٹائن کے لیے تیسرا اور اپنا دوسرا گول کیا، یہ گول اُنہوں نے میسی کے عمدہ پاس پر بنایا ، کروشیا کی ٹیم کوشش کے باوجود کوئی گول نہ کرسکی۔
