پاکستان سپر لیگ (پی ایس ایل) سیون کے 24ویں میچ میں پشاور زلمی نے اسلام آباد یونائیٹڈ کو 10 رنز سے شکست دے کر پوائنٹس ٹیبل پر تیسری پوزیشن پر قبضہ جمالیا۔
قذافی اسٹیڈیم لاہور میں کھیلے گئے اس میچ میں پشاور زلمی نے ٹاس جیت کر پہلے بیٹنگ کرنے کا فیصلہ کیا تھا جہاں اس نے یونائیٹڈ کو 207 رنز کا ہدف دیا تھا۔
ہدف کے تعاقب میں اسلام آباد یونائیٹڈ کی ٹیم مقررہ 20 اوورز میں 196 رنز ہی بناسکی۔
نوجوان وکٹ کیپر بیٹسمین اعظم خان نے 45 گیندوں پر 85 رنز کی اننگز کھیلی لیکن ٹیم کو نہ جتواسکے۔
جارحانہ انداز میں اننگز کا آغاز کرنے والے رحمان اللّٰہ گرباز نے 19 گیندوں پر 46 رنز کی اننگز کھیلی۔
ان دونوں کے علاوہ مبشر خان 21 اور کپتان آصف علی 11 رنز بنا کر دیگر نمایاں بلے باز رہے۔
پشاور زلمی کی جانب سے آج پی ایس ایل میں وکٹوں کی سنچری کرنے والے وہاب ریاض نے 2 وکٹیں لی جبکہ ان کے علاوہ سلمان ارشاد نے 3 آؤٹ کیے۔
اس سے قبل مستقبل کپتان شاداب خان کی غیر موجودگی میں میدان میں اترنے والی اسلام آباد یونائیٹڈ کے بولرز کی پشاور زلمی کے بیٹرز نے درگت بنادی تھی۔
پہلے نوجوان محمد حارث نے 32 گیندوں پر 70 رنز کی اننگز کھیلی جبکہ اس کے بعد شعیب ملک کے 38 اور یاسر خان کے 35 رنز کے ساتھ دیگر بلے بازوں کی کوششوں سے پشاور زلمی کی ٹیم مقررہ 20 اوورز میں 206 رنز بنانے میں کامیاب ہوئی۔
اسلام آباد یونائیٹڈ کی جانب سے تجربہ کار فہیم اشرف 3 وکٹیں لے کر نمایاں بولر رہے جبکہ ان کے علاوہ وقاص مقصود نے 2 اور لیام ڈاسن، مرچنگ ڈی لینگے، ظاہر خان نے ایک ایک وکٹ لی۔
ٹاس کے موقع پر گفتگو کرتے ہوئے پشاور زلمی کے کپتان وہاب ریاض کا کہنا تھا کہ 175 پلس اسکور کر کے حریف ٹیم کو دباؤ میں لائیں گے۔
شاداب کی غیر موجودگی میں اسلام آباد یونائیٹڈ کی قیادت کرنے والے آصف علی نے کہا کہ ٹیم میں پانچ تبدیلیاں کی ہیں، کچھ کھلاڑیوں کی واپسی ہوئی ہے۔
انہوں نے کہا کہ تمام کھلاڑی پرفارم کر کے آئیں گے، پی ایس ایل میں اچھا موقع ہے۔
اپنے بارے میں آصف علی کا کہنا تھا کہ ضرورت پڑی تو بولنگ بھی کروں گا۔
