اسلام آباد ہائی کورٹ نے غیر قانونی گرفتاریوں کے کیس میں توہین عدالت پر ڈپٹی کمشنر اسلام آباد عرفان نواز کو 6 ماہ قید کی سزا سنا دی۔
تفصیلات کے مطابق آئی جی اسلام آباد، ڈی سی اسلام آباد، ایس ایس پی آپریشنز اور ایس پی صدر عدالت میں پیش ہوئے، اسلام آباد ہائی کورٹ کے جسٹس بابر ستار نے محفوظ شدہ فیصلہ سنایا۔
فیصلے میں کہا گیا ہے کہ ڈپٹی کمشنر اسلام آباد عرفان نواز میمن، ایس ایس پی آپریشنز ملک جمیل ظفر مس کنڈکٹ کے مرتکب قرار پائے ہیں۔
عدالت نے ڈپٹی کمشنر اسلام آباد کو 6 ماہ قید کی سزا، ایس ایس پی آپریشنز کو 4 ماہ جیل اور ایک لاکھ جرمانہ، ایس ایچ او کو بھی 2 ماہ جیل اور ایک لاکھ جرمانے کی سزا سنائی ہے جبکہ ایس پی صدر کو توہین عدالت کیس میں بری کردیا ہے۔
عدالت نے مختصر سزا کی وجہ سے ڈی سی، ایس ایس پی آپریشنز اور ایس ایچ او کی سزائیں 30 روز کے لیے سزائیں معطل کر دیں ساتھ ہی اسلام آباد ہائیکورٹ کی عدالتی فیصلے کی کاپی وزیراعظم کو فراہم کرنے کی ہدایت بھی کی ہے
