طوفان کی زد میں آکر بحیرہ اسود (بلیک سی) میں ترکیہ کا کارگو بحری جہاز عملے سمیت لاپتا ہوگیا۔
بین الاقوامی خبر رساں ادارے کی رپورٹ کے مطابق لاپتا ترک کارگو جہاز سے بحیرہ اسود میں آنے والے طوفان میں پھنسنے کے بعد رابطہ منقطع ہو گیا تھا جس کے بعد سے بحری جہاز عملے سمیت غرق ہونے کی اطلاعات سامنے آرہی ہیں۔
حکام کا اس حوالے سے کہنا ہے کہ لاپتا ہونے والے کافکا میٹلر نامی ترک کارگو جہاز پر کپتان سمیت عملے کے 12 افراد سوار تھے۔جن سے رابطہ منقطع ہوگیا ہے۔
حکام کے مطابق جہاز کے کپتان نے اتوار کی صبح اطلاع دی تھی کہ جہاز ترکیہ کے شمال مغربی صوبے زونگلوداک کی حدود میں ایرگلی کے پانیوں سے گزر رہا ہے۔
تیز ہواؤں کے باعث ہیلی کاپٹروں کے ذریعے بھی تلاش کا کام شروع کرنا ممکن نہیں ہے، جبکہ علاقے میں سمندری طوفان کے باعث لاپتا جہاز کی تلاش کیلئے ریسکیو کشتیوں کے روانہ کرنے میں مشکلات درپیش ہیں۔
حکام کا کہنا ہے کہ ریسکیو اور تلاش کا کام شروع کرنے کیلئے تمام تیاریاں مکمل ہیں، ٹیمیں بھی تیار ہیں جیسے ہی موسمی حالات مناسب ہوں گے ٹیمیں روانہ ہوجائیں گی۔
