پاکستان کے خلاف ایشیا کپ میں میچ کے دوران افغان کھلاڑیوں کے رویے پر سابق کپتان قومی کرکٹ ٹیم لیجنڈ جاوید میانداد بھی پھٹ پڑے اور کہا کہ انہیں جمعہ جمعہ آٹھ دن ہوئے کرکٹ میں آئے ، اب ہمیں آنکھیں دکھائیں گے۔
جاوید میانداد کا کہنا تھا کہ پاکستان کی جیت پر خوشی، لیکن جن سے جیتے ان سے بہت مایوسی ہوئی۔ افغانستان کے کھلاڑیوں کا رویہ خراب تھا، افغانستان کو لانے اور کھلانے والے ہم تھے۔
جاوید میانداد کا کہنا تھا کہ افغانی کھلاڑیوں نے کرکٹ کم کھیلی ہے لیکن ابھی سے ان کے دماغ خراب ہیں۔انہوں نے پاکستان میں کرکٹ سیکھی، میں نے خود ان کی کوچنگ کی۔
انہوں نے افغان کھلاڑیوں کو مشورہ دیا کہ ’ابھی آپ کی کرکٹ کچھ بھی نہیں، کرکٹ سیکھو اور کرکٹر بنو۔‘
کپتان قومی کرکٹ ٹیم بابر اعظم کو مشورہ دیتے ہوئے جاوید میانداد نے کہا کہ بابر کو رنز کی فکر نہیں کرنی چاہیے، وہ پچ پر وقت لیں۔
ان کا کہنا تھا کہ سنگل اور ڈبلز کے لیے جائیں رنز خود بخود بننا شروع ہوجائیں گے۔
