روسی صدر پیوٹن اور ڈونلڈ ٹرمپ کے درمیان ٹیلیفونک رابطہ ہوا، پیوٹن نے ایران سے جنگ ختم کرنے کامشورہ دیدیا
روسی صدر ولادیمیر پیوٹن اور امریکی صدر ڈونلڈ ٹرمپ کے درمیان پیر کو فون پر گفتگو ہوئی جس میں ایران میں جاری کشیدگی اور یوکرین میں امن مذاکرات سمیت دیگر اہم عالمی مسائل پر تبادلۂ خیال کیا گیا، یہ بات روسی ریاستی خبر رساں ایجنسی تاس نے رپورٹ کی۔
کرملن کے معاون یوری اوشاکوف نے صحافیوں سے گفتگو میں بتایا کہ کال ٹرمپ کی جانب سے شروع کی گئی اور تقریباً ایک گھنٹے تک جاری رہی جسے “کاروباری، کھرا اور تعمیری” قرار دیا گیا۔
انہوں نے کہا کہ گفتگو کا مرکز ایران کے حوالے سے موجودہ صورتحال اور یوکرین میں امن کے لیے سہ فریقی مذاکرات تھے، جن میں امریکی نمائندوں کی شرکت بھی شامل ہے۔
اوشاکوف کے مطابق ٹرمپ نے یوکرین میں فوری جنگ بندی اور پائیدار حل میں اپنی دلچسپی کا اعادہ کیا۔
یہ فون کال اس تنازع کے حوالے سے دونوں ممالک کے درمیان حالیہ روابط کا حصہ تھی، جس میں دیگر عالمی امور جیسے مڈل ایسٹ کی صورتحال اور روس–یوکرین جنگ کے حل پر بات چیت بھی شامل رہی۔
