یو این جنرل اسمبلی آمد پر اسکیلیٹر خراب ہونے کا معاملہ، اقوام متحدہ کی وضاحت
نیویارک میں اقوام متحدہ کی جنرل اسمبلی کے اجلاس کے موقع پر امریکی صدر ڈونلڈ ٹرمپ اور خاتون اول میلانیا ٹرمپ ایک دلچسپ صورتحال کا شکار ہوگئے۔ جب وہ اپنے عملے کے ساتھ اقوام متحدہ کے ہیڈکوارٹر پہنچے تو بالائی منزل پر جانے کے لیے اسکیلیٹر پر سوار ہوئے۔ اچانک اسکیلیٹر خراب ہوگیا جس کے بعد صدر ٹرمپ اور میلانیا کو سیڑھیوں کے ذریعے اوپر جانا پڑا۔
اس واقعے پر اقوام متحدہ کے ترجمان اسٹیفن ڈوجارک نے وضاحت پیش کی۔ انہوں نے بتایا کہ ممکنہ طور پر صدر ٹرمپ کے ویڈیو گرافر نے تصاویر لینے کے دوران نادانستہ طور پر حفاظتی بٹن کو دبایا۔ یہ حفاظتی نظام اس لیے بنایا گیا ہے تاکہ کسی بھی فرد یا چیز کو حادثاتی طور پر پھنسنے سے بچایا جا سکے۔
غیر ملکی خبر ایجنسی کے مطابق ترجمان کا کہنا تھا کہ فوٹو گرافر اسکیلیٹر پر پیچھے کی طرف حرکت کر رہا تھا جس کی وجہ سے یہ صورتحال پیش آئی۔
واضح رہے کہ اپنی تقریر کے دوران صدر ٹرمپ نے اقوام متحدہ پر تنقید کرتے ہوئے کہا تھا کہ "یہاں آنے پر مجھے صرف ایک خراب اسکیلیٹر ملا، اگر خاتون اول کی صحت اچھی نہ ہوتی تو وہ گر جاتیں۔”
