برازیل کی سپریم کورٹ نے سابق صدر جائیر بولسونارو کو بغاوت کی سازش کا مجرم قرار دے کر 27 سال اور 3 ماہ قید کی سزا سنا دی ہے۔ یہ فیصلہ سپریم کورٹ کے پانچ رکنی بینچ نے سنایا، جس میں چار ججز نے سزا کے حق میں ووٹ دیا جبکہ ایک جج نے انہیں بری کرنے کی حمایت کی۔
فیصلے کے بعد سابق صدر کے وکیل نے اعلان کیا ہے کہ وہ اس کے خلاف اپیل دائر کریں گے اور مطالبہ کریں گے کہ مقدمے کی سماعت فل کورٹ کرے جس میں 11 ججز شامل ہوں۔
بولسونارو اس وقت اپنے گھر میں نظر بند ہیں اور عدالت میں پیش نہیں ہوئے۔ فیصلے کے بعد ملک کے مختلف شہروں میں ان کے حامی سڑکوں پر نکل آئے اور احتجاج شروع کر دیا۔
امریکی صدر ڈونلڈ ٹرمپ نے بھی ردعمل دیتے ہوئے کہا کہ بولسونارو کے خلاف فیصلہ مایوس کن اور غیر متوقع ہے۔ ان کا کہنا تھا کہ برازیلین سپریم کورٹ کا فیصلہ عالمی سطح پر حیران کن سمجھا جا رہا ہے۔
یاد رہے کہ جائیر بولسونارو پر الزام تھا کہ انہوں نے 2022 کے انتخابات کے بعد اقتدار پر قبضے کی کوشش کی تھی۔ عدالتی فیصلے کے بعد برازیل میں سیاسی ماحول مزید کشیدہ ہو گیا ہے۔
