پاکستان مسلم لیگ (ن) کے قائد اور سابق وزیراعظم نواز شریف نے کہا کہ وہ کون ہیں جو نواز شریف کو ہر چند سال بعد قوم سے جدا کر دیتے ہیں، ہم نے تو ملک کی تعمیر کی، ایٹم بم بنایا، لوڈ شیڈنگ ختم کی ہے۔
لاہور میں مینار پاکستان پر ہونے والے مسلم لیگ ن کے جلسے سے خطاب کرتے ہوئے نواز شریف نے کہا کہ کہاں سے چھیڑوں فسانہ کہاں تمام کروں؟ ذرا نظر جو ملے پھر انھیں سلام کروں، یہ پوری لائن ہے، ہم سب لوگوں کے خلاف کیسز بنائے گئے مگر کسی نے ن لیگ کا جھنڈا نہیں چھوڑا۔
اس سے قبل نواز شریف گاڑیوں کے قافلے کے ساتھ مینار پاکستان پر ہونے والے جلسہ گاہ میں پہنچے تھے، مسلم لیگ ن کے رہنما شہباز شریف، اسحاق ڈار اور دیگر رہنما بھی ان کے ہمراہ موجود تھے، جلسہ گاہ میں نواز شریف کی آمد پر آتش بازی کا شاندار مظاہرہ کیا گیا۔
جلسہ گاہ میں فلسطین کے حوالے سے قرار داد بھی منظور کی گئی۔
پاکستان مسلم لیگ (ن) کے صدر شہباز شریف نے کہا کہ نواز شریف کو خوش آمدید کہنے پورے پاکستان سے آئے لوگوں کو سلام پیش کرتا ہوں، ٹھاٹھیں مارتا سمندر گواہ ہے تاریخ میں مینار پاکستان پر اس سے بڑا جلسہ نہیں ہوا۔
اس سے پہلے مریم نواز کا کہنا تھا کہ وتعز من تشاء وتذل من تشاء۔
نواز شریف کی آمد سے قبل جلسے سے خطاب کرتے ہوئے مریم نواز کا کہنا تھا کہ نواز شریف آج ایک بار پھر آپ کے درمیان موجود ہے۔
مریم نواز کا کہنا تھا کہ نواز شریف آن بان اور شان کے ساتھ اپنے لوگوں میں واپس آگیا ہے، مینار پاکستان کا میدان نواز شریف کے شیروں کے لیے چھوٹا پڑ گیا ہے۔
رہنما مسلم لیگ ن نے کہا کہ آپ کو مینار پاکستان میں خوش آمدید کہتے ہیں، یہاں پنجاب، سندھ، خیبر پختونخوا، گلگت بلتستان، آزاد کشمیر اور بلوچستان بھی ہے، پورا پاکستان یہاں پر موجود ہے۔
مریم نواز نے مزید کہا کہ آج تقریر صرف نواز شریف کریں گے، میں تقریر نہیں کروں گی، یہاں پر 10 فیصد لوگ موجود ہیں باقی لوگ سڑکوں پر ہیں، نواز شریف کو مٹانے والے کتنے آئے اور کتنے چلے گئے، جو کہتے تھے نواز شریف کی سیاست ختم ہوگئی، وہ دیکھیں آج نواز شریف واپس آرہے ہیں۔
رہنما مسلم لیگ ن نے کہا کہ نواز شریف اللّٰہ کے فضل سے اپنے گھر، اپنی مٹی اپنے وطن واپس آئے ہیں۔
مریم نواز کے ساتھ حمزہ شہباز بھی اسٹیج پر موجود تھے اس موقع پر مریم نواز نے کہا کہ جو کہتے تھے ن سے ش نکلے گی، دیکھیں ن اور ش ساتھ ہیں، ن اور ش ایک ہیں ماشاءاللّٰہ، اللّٰہ دونوں بھائیوں اور بہن بھائی کی جوڑی سلامت رکھے۔
یاد رہے کہ پاکستان مسلم لیگ (ن) کے قائد نواز شریف چار سال بعد وطن واپس پہنچ گئے۔ لاہور ایئرپورٹ پر سابق وزیراعظم شہباز شریف اور ن لیگی رہنماؤں نے نواز شریف کا استقبال کیا۔ کارکنان نے بھی اپنے قائد کا بھرپور استقبال کیا اور خوشی سے نہال ہوگئے۔
نواز شریف دبئی سے خصوصی طیارے کے ذریعے براستہ اسلام آباد لاہور پہنچے۔
اس سے قبل اسلام آباد ایئرپورٹ پر قانونی دستاویزات پر دستخط کرنے کے بعد سابق وزیراعظم خصوصی طیارے میں سوار ہوئے جو انہیں اسلام آباد سے لے کر لاہور پہنچا۔
ن لیگی قائد کا لاہور ایئرپورٹ پر سابق وزیراعظم اور ان کے چھوٹے بھائی شہباز شریف سمیت دیگر رہنماؤں نے استقبال کیا۔ نواز شریف کے ساتھ اسحاق ڈار اور اعظم نذیر تارڑ بھی لاہور پہنچے۔
