ترجمان وزیراعلٰی و پنجاب حکومت مسرت جمشید چیمہ نے انسانی حقوق کے عالمی دن پر اپنے بیان میں کہا ہے کہ ہم کشمیر میں مسلمانوں پر توڑے گئےظلم و ستم پر اقوام متحدہ سے نوٹس لینے کا مطالبہ کرتے ہیں۔اقوام متحدہ کی قراردادوں اور کشمیری عوام کے حق خودارادیت پر من و عن عمل کروایا جائے۔
انسانی حقوق کے عالمی دن پر ہم کشمیر کی عوام کو نہیں بھول سکتے. پچھلی 7 دہائیوں سے لاکھوں بھارتی فوجی کشمیر پر قابض ہیں. کشمیر کو دنیا کی سب سے بڑی جیل میں بدل دیا گیا ہے لیکن کشمیری عوام آج بھی ثابت قدمی سے آزادی کی جدوجہد کر رہے ہیں۔
اس مسئلہ پر عالمی برادری کی خاموشی بھارت کو مظالم کا لائسنس دے رہی ہے۔ مسرت جمشید نے کہا کہ دوسری طرف دنیا کے 33ویں بڑے ملک پاکستان میں بھی سیاسی مافیا نے بنیادی انسانی حقوق سلب کر رکھے ہیں۔
فاشسٹ حکومت نے حقوق کی بربادی کے ریکارڈ قائم کر دیے ہیں۔آج بولنے اور لکھنے کی آزادی سے محروم طبقہ کی آواز اٹھانے کا دن ہے۔میڈیا پر لگائی گئی قدغن اور سیاسی جماعتوں کے کارکنوں پر ظلم کیخلاف آواز اٹھانے کا دن ہے۔
180ممالک کی فہرست میں پاکستانی میڈیا 157نمبر پرجاچکا ہے۔ جبکہ 139 ممالک کی فہرست میں ہماری عدلیہ 130ویں نمبر پر پہنچ چکی ہے
ٹرانسپیرنسی انٹرنیشنل رپورٹ کے مطابق پاکستان کے کرپٹ اداروں میں عدلیہ تیسرے نمبر پر ہے۔ یہاں تحقیقاتی صحافت کرنیوالے صحافیوں کو گولیوں سے چھلنی کیا جاتا ہے۔
ارشد شریف قتل کیس بنیادی انسانی حقوق کی خلاف ورزیوں کی بدترین مثال ہے۔ ریاستی ظلم وجبر کی مثال اعظم سواتی کیخلاف آئے روز مقدمات کی تعداد بڑھتی جارہی ہے۔ ایوان بالا کے رکن پر سچ بولنے کی پاداش میں آدھ درجن سے زائد مقدمات درج کروائے جا چکے ہیں۔سینیٹر اعظم سواتی کو بلوچستان ہائیکورٹ نے رہا کیا تو سندھ پولیس اٹھا کر لے گئی۔ بزرگ شہری کو بیوی اور بچوں کے سامنے زودوکوب کرنا کس ملک کا آئین اجازت دیتا ہے؟راستوں میں گاڑیاں روک کر بندوق کی نوک پر اٹھایا جاتا ہے۔
انہوں نے کہا کہ سیاسی ورکر شہباز گل کو ننگا کر کے بہیمانہ تشدد کیا جاتا ہے۔ ملک میں آئین کی بالادستی کی جنگ حقیقی آزادی تک جاری رہے گی۔
