چیئرمین پنجاب آئی ٹی بورڈ سید بلال حیدر کی زیرِ صدارت ارفع ٹاور میں منعقدہ اجلاس میں بتایا گیا کہ پنجاب بھر میں انتظار اور قطار سے بچنے اور شہریوں کو ایک چھت تلے ضلعی‘ صوبائی اور وفاقی خدمات کی فراہمی کیلئے پی آئی ٹی بی کی معاونت سے وضع کردہ صوبہ کے 12 ای خدمت مراکز سے اب تک 40 لاکھ سے زائد شہری مستفید ہو چکے ہیں۔
اجلاس میں بتایا گیا کہ اب تک ای خدمت مراکز سے ساڑھے 8 لاکھ افرا نے پوسٹ آفس سروسز‘ ساڑھے 6 لاکھ افراد نے ڈومیسائل سرٹیفکیٹ‘ 6 لاکھ 24 ہزار افراد نے ڈرائیونگ لائسنس‘ ساڑھے 3 لاکھ افراد نے شناختی کارڈ اور 1 لاکھ 34 ہزار لوگوں نے فرد کے اجراء کی سہولیات سے استفادہ کیا۔
چیئرمین سید بلال حیدر نے کہا کہ ای خدمت مراکز میں ایک چھت تلے اہم خدمات کی فراہمی سے شہریوں کو بہت زیادہ سہولت حاصل ہوئی ہے۔اجلاس میں بتایا گیا کہ محکمہ جنگلات اور محکمہ صنعت و تجارت کی سروسز کو بھی ای خدمت مراکز میں شامل کر لیا گیا ہے۔
