نشان حیدر پانے والے میجر محمد طفیل شہید کا آج 65 واں یوم شہادت
میجر محمد طفیل شہید نشان حیدر کا آج 65 واں یوم شہادت ہے، شہید کو فاتح لکشمی پور کے طور پر بھی جانا جاتا ہے۔
جہان پاکستان کے مطابق نشان حیدر کا اعزاز پانے والے میجر محمد طفیل شہید کا آج 65 واں یوم شہادت منایا جارہا ہے، میجر محمد طفیل شہید کو پاک فوج کی طرف سے دوسرا نشان حیدر دیا گیا تھا۔۔
میجر محمد طفیل 22 جون 1914 کو انڈین پنجاب کے علاقے ہوشیار پور میں پیدا ہوئے، شہید نے ڈی اے وی کالج جالندھر سے تعلیم حاصل کی، 1941 میں انڈین ملٹری اکیڈمی ڈیرہ دھون سے کمیشن حاصل کیا۔
وہ 1947 میں آزادی کے بعد پاک فوج کی پنجاب رجمنٹ میں شامل ہو گئے، 1954 میں مشرقی پاکستان میں ایسٹ پاکستان رائفلز میں بطور انسٹرکٹر اہم ذمہ داری سونپی گئی۔
میجر محمد طفیل کو اگست 1958 میں لکشمی پور میں گھسنے والی بھارتی فوج کے خلاف کارروائی کا حکم ملا، میجرمحمد طفیل شہید نے دشمن کی چوکی پر جوانمردی سے حملہ کیا، دشمن کی گولیوں کا سامنا کرتے ہوئے وہ شدید زخمی ہونے کے باوجود آگے بڑھتے رہے۔
انھوں نے دستی بم پھینک کر اپنے جوانوں کو شدید نقصان پہنچانے والی دشمن کی مشین گن کو ناکارہ بنا دیا، مادرِ وطن کا یہ جری بیٹا دشمن کے سامنے چند گز کے فاصلے پر بہادری سے سیسہ پلائی دیوار بنا رہا۔
میجر محمد طفیل شہید نے جرأت و بہادری کے ساتھ دشمن سے لڑتے ہوئے جام شہادت نوش کیا، شہید کی نشان حیدر کی یادگار بورے والا میں تعمیر کی گئی ہے۔
