تیز آندھی میں شیخوپورہ میں سرکس کے 4 شیر بھاگ گئے، لوگوں میں خوف و ہراس

 پنجاب کے شہر شیخوپورہ میں تیز آندھی کے باعث ایک سرکس کے 4 شیر بھاگ گئے، جس سے لوگوں میں خوف و ہراس پھیل گیا، تاہم ریسکیو ٹیم نے شیروں کو پکڑ لیا۔

تفصیلات کے مطابق شیخوپورہ میں سرکس میں پنجرے سے 4 شیر بھاگ گئے، جس سے لوگوں میں خوف و ہراس پھیل گیا، سرکس کے شیر پنجرے سے نکل کر قناتیں پھاڑ کر فرار ہوئے تھے۔

ریسکیوذرائع نے کہا ہے کہ میلہ پیر بہار شاہ میں پنجرہ ٹوٹنے سے بھاگنے والے تمام شیر پکڑ لیے گئے ہیں، تیز آندھی کے باعث پنجرہ گر کر ٹوٹ گیا تھا اور شیر بھاگ گئے تھے۔

ریسکیو ذرائع کے مطابق سرکس کے اہل کاروں، ریسکیو ٹیم، اور پولیس کے ہمراہ شہریوں نے چاروں شیروں کو تلاش کر کے پکڑا، شیروں کو پکڑنے کے دوران سرکس کا ایک شخص معمولی زخمی ہو گیا ہے۔

ریسکیو ٹیم کا کہنا تھا کہ ایک شیر بھاگ کر گھر میں داخل ہو گیا تھا جسے جلد ہی قابو کیا گیا، شیر کا ایک بچہ نہر کی طرف بھاگا تھا جسے تلاش کر کے پکڑا گیا۔