تین بھائیوں نے اپنی بیویوں کو عید پر ایک ساتھ طلاق دے ڈالی، وجہ کیا بنی؟
مصر میں تین بھائیوں نے اپنی بیویوں کو عید کے موقع پر ایک ساتھ طلاق دے دی جس کی وجہ یہ ہے کہ وہ ان کی والدہ کی خدمت میں کوتاہی کی مرتکب ہوئی تھیں۔
غیر ملکی میڈیا کے مطابق یہ واقعہ مصر کے معروف سیاحتی علاقے الاقصر کمشنری کے قدامت پسند علاقے میں پیش آیا اور جس نے بھی سنا وہ حیران رہ گیا کیونکہ تینوں بھائیوں کی شادی کا یہ پہلا سال تھا۔
رپورٹ کے مطابق مذکورہ بھائیوں کی بہن اپنی ضعیف العمر والدہ کی خدمت کے لیے ہفتے میں دو بار ان کے گھر آتی تھی تاہم کچھ دنوں سے وہ اپنے شوہر کی بیماری کے باعث والدہ کی خدمت کے لیے نہیں آسکی تھی جس کے باعث بھائیوں نے فیصلہ کیا تھا کہ ان کی بیویاں والدہ کی خدمت کریں گی اور اس حوالے سے انہوں نے اپنی اپنی بیویوں کو سخت تاکید بھی کی تھی۔
تاہم ہوا اس کے برخلاف اور عید کے موقع پر جب تینوں بھائی گھر لوٹے تو دیکھا کہ محلے کی ایک بوڑھی خاتون ان کی والدہ کو نہلا رہی تھی۔ یہ دیکھتے ہی تینوں آپے سے باہر ہوگئے اور انہوں نے بغیر کوئی مہلت کے اپنی بیویوں کو طلاق دے دی۔
انہوں نے اپنی بیویوں کے اہلخانہ کو فون کر کے کہا کہ ان کی بیٹیوں کے لیے ہمارے یہاں کوئی جگہ نہیں اور وہ انہیں ہمارے یہاں سے لے جائیں۔
اجتماعی طلاق کی خبر پورے علاقے میں جنگل کی آگ کی طرح پھیل گئی۔
