مسلم لیگ ن کی جانب سے پنجاب اسمبلی کی تحلیل روکنے کیلئے 2 آپشنز اکٹھے استعمال کرنے کا امکان ہے۔
تفصیلات کے مطابق مسلم لیگ ن نے پنجاب اسمبلی کی تحلیل روکنے کیلئے حکمت عملی تیار کرلی ، ن لیگ کی جانب سے 2 آپشنز اکٹھے استعمال کرنے کا امکان ہے۔
ذرائع نے کہا ہے کہ یکم دسمبر کو گورنر کی جانب سے وزیراعلیٰ پنجاب کو اعتماد کے ووٹ کا کہا جائے گا، ایک سے 2 گھنٹے کے وقفے سے لیگی ایم پی اے تحریک عدم اعتماد جمع کرائیں گے۔
پارٹی قیادت کی جانب سے ہدایات جاری کر دی گئی ہیں کہ ن لیگ کے تمام اراکین پنجاب اسمبلی کو فوری لاہور پہنچنے کی ہدایت کی ہے۔
پارٹی ذرائع نے بتایا کہ لیگی اراکین کو پارٹی سے مکمل رابطے میں رہنے اور اراکین کو تاحکم ثانی صوبائی دارالحکومت میں رہنے کی ہدایت کی ہے۔
ذرائع کا کہنا تھا کہ پارٹی قیادت کی دیگر عہدیداروں کو اتحادی اراکین سے بھی رابطے کی ہدایت کردی ہے جبکہ متحدہ اپوزیشن کے آزاد اراکین اسمبلی کو بھی لاہور پہنچنے کی درخواست کی ہے۔
ذرائع کے مطابق ن لیگ نے ارکان اسمبلی سے تحریک عدم اعتماد پر دستخط کرا لئے ہیں اور پیپلز پارٹی اور آزاد ارکان سے مشاورت مکمل کر لی ہے۔
