پی سی بی نے جنوری کے آخر میں آسٹریلیا کے دورۂ پاکستان کی تصدیق کر دی ہے، جس کے تحت دونوں ٹیموں کے درمیان تین ٹی ٹوئنٹی میچز کی سیریز کھیلی جائے گی۔ سیریز کے تمام میچز قذافی اسٹیڈیم لاہور میں ہوں گے اور اس کا آغاز 29 جنوری سے ہوگا، جبکہ دیگر میچز 31 جنوری اور یکم فروری کو کھیلے جائیں گے۔
آسٹریلوی ٹی ٹوئنٹی اسکواڈ بدھ 28 جنوری کو لاہور پہنچے گا۔ تینوں میچز میں ٹاس پاکستانی وقت کے مطابق شام 5:30 بجے ہوگا جبکہ پہلی گیند شام 6 بجے کرائی جائے گی۔ یہ سیریز آئندہ ماہ ہونے والے آئی سی سی مینز ٹی ٹوئنٹی ورلڈ کپ 2026 سے قبل دونوں ٹیموں کے لیے انتہائی اہم قرار دی جا رہی ہے۔ ورلڈ کپ میں پاکستان گروپ اے جبکہ آسٹریلیا گروپ بی میں شامل ہے۔
یہ مارچ 2022 کے بعد آسٹریلیا کا پاکستان کا تیسرا دورہ ہوگا۔ 2022 میں آسٹریلوی ٹیم نے پاکستان میں ایک ٹیسٹ سیریز، تین ون ڈے اور ایک ٹی ٹوئنٹی میچ کھیلا تھا، جبکہ آئی سی سی چیمپئنز ٹرافی 2025 کے تین میچز بھی پاکستان میں کھیلے گئے۔ قذافی اسٹیڈیم میں کھیلے گئے واحد ٹی ٹوئنٹی میچ میں آسٹریلیا نے پاکستان کو تین وکٹوں سے شکست دی تھی۔
پی سی بی کے چیف آپریٹنگ آفیسر سید سمیر احمد سید کا کہنا ہے کہ وہ آسٹریلیا کی تین ٹی ٹوئنٹی میچز پر مشتمل سیریز کی میزبانی پر پُرجوش ہیں۔ ان کے مطابق یہ سیریز پاکستانی شائقینِ کرکٹ کے لیے سال کا شاندار آغاز ثابت ہوگی۔ انہوں نے مزید کہا کہ مارچ 2022 کے بعد سے آسٹریلوی ٹیم قذافی اسٹیڈیم میں ایک ٹیسٹ، پانچ ون ڈے اور ایک ٹی ٹوئنٹی میچ کھیل چکی ہے، اس لیے یہ میدان ان کے لیے مانوس ہو چکا ہے۔
شیڈول کے مطابق پہلا ٹی ٹوئنٹی میچ جمعرات 29 جنوری، دوسرا ہفتہ 31 جنوری اور تیسرا اتوار یکم فروری کو شام 6 بجے کھیلا جائے گا، جبکہ تینوں میچز قذافی اسٹیڈیم لاہور میں ہوں گے۔
