لاہور(پ ر)صدر مملکت نے معروف مذہبی سکالر علامہ ڈاکٹرمحمد راغب حسین نعیمی کودوبارہ اسلامی نظریاتی کونسل کاچیئرمین مقررکردیا ہے۔وزارت قانون وانصاف نے علامہ ڈاکٹرمحمد راغب حسین نعیمی کی بطور اسلامی نظریاتی کونسل چیئرمین کی تقرری کا نوٹیفکیشن بھی جاری کردیا ہے۔علامہ ڈاکٹر راغب نعیمی کی تعیناتی کی مدت تین سال مقرر کی گئی ہے۔علامہ ڈاکٹرمحمدراغب حسین نعیمی نے لاہور میں وزیراعظم پاکستان میاں محمدشہباز شریف سے ملاقات کی ہے۔ملاقات کے دوران دونوں رہنماؤں نے ملک میں مذہبی آہنگی کے فروغ کے حوالہ سے تبادلہ خیال کیا اس موقع پروزیراعظم پاکستان میاں محمدشہباز شریف نے علامہ ڈاکٹرمحمدراغب حسین نعیمی کو دوسری بار چیئرمین اسلامی نظریاتی کونسل مقرر ہونے پر مبارکباد دی اورنیک خواہشات کااظہار کیا۔صدر پاکستان نے، وزیراعظم پاکستان کی سفارش پر تین سال کے لیے ڈاکٹر راغب حسین نعیمی کو رکن تعینات کر کے چئیرمین تعینات کیا ہے۔ اس سے قبل یہ عہدہ یکم نومبر ۲۰۲۵ کو خالی ہو گیا تھا۔ ڈاکٹر نعیمی کونسل کے چیئرمین کی حیثیت سے بشمول ۸ ارکان کونسل، اپنی مدت رکنیت مکمل ہونے پر ریٹائیر ہو گئے تھے۔یاد رہے ڈاکٹرراغب حسین نعیمی اس وقت کئی پوزیشن پرخدمات سرانجام دے رہے ہیں۔ڈاکٹر راغب حسین نعیمی لاہور میں معروف دینی درسگاہ جامعہ نعیمیہ کے ناظم اعلیٰ ہیں۔متحدہ علما بورڈ پنجاب اورپنجاب قرآن بورڈ کے چیئرمین بھی رہے ہیں، آپ پنجاب زکوۃٰ کونسل اورمرکزی رویت ہلال کمیٹی کے رکن بھی ہیں۔پنجاب یونیورسٹی لاہور اورزرعی یورنیورسٹی فیصل آباد کے سنڈیکٹ کے ممبر ہیں۔آپ نے دینی تعلیم دارالعلوم جامعہ نعیمیہ لاہورسے حاصل کی ہے۔ڈاکٹر راغب نعیمی گورنمنٹ کالج کے گریجویٹ ہیں، وہ پنجاب یونیورسٹی سے ایم اے عربی میں گولڈ میڈلسٹ اور اسلامی معاشیات میں پی ایچ ڈی ہیں۔تعلیم کے فروغ،امن وامان کے قیام اوربین المذاہب ومسالک کے فروغ کیلئے آپ کی خدمات کو قدر کی نگاہ سے دیکھا جاتاہے۔ آپ کو دینی،تعلیمی اورسماجی خدمات کے اعتراف میں صدرمملکت کی جانب سے ستارہ امتیازسے نوازا گیا ہے۔
