متحدہ عرب امارات میں پٹرول سستا پاکستان میں مہنگا ہوا

متحدہ عرب امارات نے جمعہ 31 اکتوبر کو پیٹرولیم مصنوعات کی نئی قیمتوں کا اعلان کرتے ہوئے نومبر 2025 کے لیے پیٹرول کی قیمتوں میں نمایاں کمی کر دی ہے۔ عالمی منڈی میں خام تیل کی قیمتوں میں کمی کے بعد یہ فیصلہ براہِ راست صارفین کو ریلیف فراہم کرنے کے لیے کیا گیا ہے۔

فیول پرائس مانیٹرنگ کمیٹی کے اعلان کے مطابق نومبر میں پیٹرول کی قیمتیں اکتوبر کے مقابلے میں مجموعی طور پر 10 سے 11 روپے فی لیٹر کم کر دی گئی ہیں۔ سپر، اسپیشل اور ای پلس، تینوں گریڈ کے پیٹرول میں واضح کمی ریکارڈ کی گئی ہے۔

اعداد و شمار کے مطابق:

سپر پیٹرول
اکتوبر: 2.77 درہم (تقریباً 212 روپے)
نومبر: 2.63 درہم (تقریباً 201 روپے)
کمی: تقریباً 11 روپے فی لیٹر

اسپیشل پیٹرول
اکتوبر: 2.66 درہم (تقریباً 203 روپے)
نومبر: 2.51 درہم (تقریباً 192 روپے)

ای پلس پیٹرول
اکتوبر: 2.58 درہم (تقریباً 197 روپے)
نومبر: 2.44 درہم (تقریباً 187 روپے)

فیول پرائس کمیٹی نے واضح کیا ہے کہ نئی قیمتیں فوری طور پر نافذالعمل ہو گئی ہیں۔ امارات میں تیل کی قیمتوں کا تعین ہر ماہ بین الاقوامی مارکیٹ میں خام تیل کی اوسط قیمت، فریٹ چارجز اور مقامی ڈسٹری بیوشن کمپنیوں کے آپریشنل اخراجات کو مدنظر رکھتے ہوئے کیا جاتا ہے۔

دوسری جانب پاکستان میں اسی مدت کے دوران پیٹرولیم مصنوعات کی قیمتوں میں اضافہ کیا گیا ہے۔ حکومتِ پاکستان نے گزشتہ روز نئی قیمتوں کا اعلان کرتے ہوئے پیٹرول کی فی لیٹر قیمت میں 2 روپے 43 پیسے اور ڈیزل میں 3 روپے 2 پیسے اضافہ کیا۔ اس کے بعد:

پیٹرول فی لیٹر قیمت: 265 روپے 45 پیسے

ڈیزل فی لیٹر قیمت: 278 روپے 44 پیسے

متحدہ عرب امارات میں پیٹرول کی قیمتوں میں کمی جبکہ پاکستان میں قیمتوں میں اضافے نے دونوں ممالک میں توانائی لاگت کے فرق کو مزید نمایاں کر دیا ہے۔ ماہرین عالمی منڈی میں خام تیل کے اتار چڑھاؤ کو اس فرق کی بنیادی وجہ قرار دے رہے ہیں۔