امریکی جریدے فارن افیئرز نے اپنی تازہ رپورٹ میں کہا ہے کہ بھارت پر انحصار کی امریکی پالیسی ناکام ثابت ہوئی ہے اور پاکستان امریکا کا زیادہ قابلِ اعتماد شراکت دار رہا ہے۔
رپورٹ کے مطابق بھارت کبھی بھی امریکا کا بھروسا مند پارٹنر نہیں رہا اور نہ ہی وہ واشنگٹن کی توقعات پر پورا اترا۔ اس کے برعکس پاکستان نے دہشت گردی کے خلاف اقدامات اور بھارت کے ساتھ کشیدگی کم کرنے کی کوششوں میں کردار ادا کیا ہے، جسے سابق صدر ڈونلڈ ٹرمپ نے بھی سراہا تھا۔
فارن افیئرز کا کہنا ہے کہ امریکا اور پاکستان کے درمیان تجارتی و توانائی معاہدے دونوں ملکوں کے لیے فائدہ مند ہیں، جبکہ ریکو ڈیک سمیت پاکستانی وسائل میں امریکی سرمایہ کاری خطے میں استحکام کا ذریعہ بن سکتی ہے۔
رپورٹ کے مطابق بھارت پر حد سے زیادہ توجہ دینے کی پالیسی نہ صرف خطے میں تقسیم پیدا کرے گی بلکہ جنگ کے خطرات کو بھی بڑھا سکتی ہے۔ دوسری جانب پاکستان کی قومی سلامتی پالیسی امریکا اور چین کے ساتھ متوازن تعلقات پر زور دیتی ہے۔ ماضی میں بھی پاکستان نے واشنگٹن اور بیجنگ کو قریب لانے کا کردار ادا کیا تھا۔
فارن افیئرز نے خبردار کیا کہ بھارت پر مرکوز امریکی پالیسی پاکستان کو دور کر کے خطے میں واشنگٹن کے اثر و رسوخ کو کمزور کرے گی۔
