پاکستان تحریک انصاف کو قومی اسمبلی میں ایک اور بڑا جھٹکا لگا ہے۔ پارٹی کے تین بڑے عہدے ختم کر دیے گئے ہیں، جن میں اپوزیشن لیڈر، پارلیمانی لیڈر اور ڈپٹی پارلیمانی لیڈر شامل ہیں۔
ذرائع کے مطابق عمر ایوب اپوزیشن لیڈر کے عہدے سے فارغ ہوگئے ہیں، جبکہ زرتاج گل کا پارلیمانی لیڈر اور احمد چٹھہ کا ڈپٹی پارلیمانی لیڈر کا عہدہ بھی ختم کر دیا گیا ہے۔ اپوزیشن لیڈر کا چیمبر بھی پی ٹی آئی سے واپس لے لیا گیا ہے۔
اسپیکر قومی اسمبلی نے ایوان کو آگاہ کیا کہ کچھ ارکان نااہل ہو گئے ہیں، جس کے بعد نئے اپوزیشن لیڈر کے انتخاب کے لیے اپوزیشن اور اسپیکر کے درمیان مشاورت دوبارہ شروع ہوگی۔ اسپیکر جلد نئے اپوزیشن لیڈر کا نوٹیفیکیشن جاری کریں گے۔
پی ٹی آئی کے آزاد اراکین کو پارلیمانی اور ڈپٹی پارلیمانی لیڈر کے لیے نئے نام دینے ہوں گے۔ اس کے ساتھ ہی عمر ایوب کو پبلک اکاؤنٹس کمیٹی اور فنانس کمیٹی سے بھی ڈی لسٹ کر دیا گیا ہے۔
مزید یہ کہ پی ٹی آئی کے نااہل سات ارکان سے پندرہ قائمہ کمیٹیوں کی رکنیت واپس لے لی گئی ہے۔ صاحبزادہ حامد رضا سے قائمہ کمیٹی برائے انسانی حقوق کی چیئرمین شپ، زرتاج گل سے اسی کمیٹی کی رکنیت، اور رائے حسن نواز سے قائمہ کمیٹی برائے ریلوے کی چیئرمین شپ ختم کر دی گئی ہے۔
