تحریک قیام پاکستان میں قائد اعظم محمد علی جناح کا دست و بازو رہنے والی ہمشیرہ مادر ملت فاطمہ جناح کی 58 ویں برسی آج منائی جا رہی ہے۔
مادر ملت فاطمہ جناح کی پیدائش جناح خاندان میں 30 جولائی 1893 کو ہوئی، وہ جناح بائی پونجا اور مٹھی بائی کے 7 بچوں میں سب سے چھوٹی تھیں۔
فاطمہ جناح کو مادر ملت یعنی قوم کی ماں کے لقب سے جانا جاتا ہے، وہ تجربہ کار اور قابل احترام خاتون سیاسی رہنما، دانتوں کی سرجن اور پاکستان کے معروف بانیوں میں سے ایک تھیں۔
انہیں پاکستان کے بانی اور پہلے گورنر جنرل قائد اعظم محمد علی جناحؒ کی چھوٹی بہن ہونے کا اعزاز حاصل ہے۔ فاطمہ جناح کی نامکمل کتاب میرا بھائی کو قائد اعظم اکیڈمی نے 1987ء میں شائع کیا، یہ کتاب قائد اعظم محمد علی جناحؒ کی سوانح عمری پر مبنی ہے۔
مادر ملت فاطمہ جناح نے پاکستان کی سیاسی تاریخ میں بھی اہم کردار ادا کیا انہوں نے ڈیکٹیٹر ایوب خان کیخلاف الیکشن لڑا، دھاندلی کے باعث فاطمہ جناح کو کامیاب ہونے سے روکا گیا یہاں تک کے ڈکٹیٹر ایوب خان نے مادر ملت فاطمہ جناح کو غدار تک قرار دیا جس کو پاکستانی قوم نے ماننے سے انکار کیا۔
محترمہ فاطمہ جناح کی وفات 9 جولائی 1967ء کو کراچی میں ہوئی اور ان کو بانی پاکستان قائد اعظم محمد علی جناحؒ کے مزار کے احاطہ میں دفن کیا گیا۔
