بیمار ماں کی دوائیوں کے لیے بھاگ بھاگ کر تھک گئی: بچی کی شکایت پر مریم نواز کا بڑا ایکشن
پنجاب کی وزیراعلیٰ مریم نواز کے میو اسپتال دورے کے دوران مریضوں نے شکایات کے انبار لگا دیے، جس پر انہوں نے انتظامیہ کی سخت سرزنش کرتے ہوئے ایم ایس کو عہدے سے فوری ہٹانے کا حکم دے دیا۔
وزیر اعلیٰ مریم نواز نے آج میو اسپتال لاہور کا دورہ کیا، میو اسپتال میں زیر علاج مریضوں اور لواحقین نے مریم نواز کو سرنج، برنولا وغیرہ تک نہ ملنے سے آگاہ کیا۔ کارڈیالوجی وارڈ میں کیڑے مکوڑے پائے جانے کی شکایت پر وزیر اعلیٰ مزید برہم ہوئیں، انھوں نے رک کر انتظار گاہ اور راستے میں کھڑے مریضوں اور لواحقین کی شکایات سنیں۔ ایک بچی کی بات سن کر مریم نواز بہت ناراض ہوئیں جس نے بتایا ’میری ماں بیمار ہے اور میں رات بھر دوائیوں کے لیے بھاگ بھاگ کر تھک گئی ہوں۔‘ ناگفتہ بہ حالات دیکھ کر وزیر اعلیٰ مریم نواز نے دورے کے دوران ہی میو اسپتال میں ہنگامی اجلاس طلب کر لیا، اور اسپتال کے امور کے بارے میں تفصیلی انکوائری اور تمام ذمہ داروں سے جواب طلب کیا۔
مریم نواز نے اس موقع پر میو اسپتال انتظامیہ کی سخت سرزنش کی، وزیراعلیٰ پنجاب نے ایم ایس کو بھی عہدے سے فوری ہٹانے کا حکم دے دیا۔ وزیراعلیٰ مریم نواز نے کہا مخلوق رل رہی ہے اور کوئی پوچھنے والا نہیں ہے، میو اسپتال کے حالات بہت برے ہیں، لوگ اسپتال میں علاج کی توقع اور امید لے کر آتے ہیں لیکن کس وارڈ میں کیا ہو رہا ہے، اسپتال انتظامیہ کو علم ہی نہیں ہے۔ انہوں نے کہاکہ جو عوام کے ساتھ ہو رہا ہے وہ اگر ذمہ داروں کے اپنوں کے ساتھ ہو تو انھیں بھی پتا چلے۔
